Kan Tikok té kour moiyin-dé, li lavé in mèt dékol té i apèl Misié Léon. Soman marmay lékol té i
kri ali : « Wistiti », parapor li té rosanm in lespès ti zako visié* i trouv dann liv zéografi. Li té inm fé la
grimas po fé ri la bous domoun, sinonsa li té i fé la malis po kas lé kui. Son bann zélèv té kontan po tout,
apark kan son kasaz lé kui, té i tourn an lo-boudin, ousansa an… zi* la kré (la kré i ékri ansanm, la !).

Lé parèy in zour : Wistiti i débark dan la klas, obout minm èk la fatig ! Marmay i trouv sa in-pé drol. Soman i kalkil daoir li la kouri ! I fé pa in kont ! Episa zot i rèt asiz parèy dabitid : Misié Léon té fine di azot : « Moin la pa lo roi Dagobèr ! Moin in kréol la mizèr konm zot minm ! Pa bezoin zot i lèv kan mi rant dan la klas. Lés sa po direktèr orksa po linspéktèr ! An Frans, banna i apèl sa “la politesse. ” Isi n’i kont konm in dantèl, nou ».

Soman alapa, so-kou-isi, dann son fatigé, Wistiti i fout in kou :
« Levez-vous… Monsieur lo Directeur arrive ! »
« Soip ! soip ! krink ! krink ! » marmay i dobout an bolid in-sèl-tré* ! Epi i agèt koté la port laba po vèy “Monsieur lo Directeur” rantré !
Wistiti, kosa i anprofit po fé ? Li sè d' trap lo bèl léponz po éfas tablo-la, plonz sa bien dann dlo, épisa pas an misouk koté Tikok, bour lo léponz mouyé si lo ban Tikok anplin désou son “tonton”*.
Na inpé la vi son tournéviré, soman Wistiti i bat in zyé èk zot po fé konprann azot di pa aryin. Kank li la fini son forfé*, li fé sanblan pas la port po gété, son tour. Oki d’ direktèr. Alors li artourn son biro, li tienbo séryé minm, li di : « Asseyez-vous ! »
« Plof ! » kan Tikok i asiz, li san in fré par-koté son “troufiyon*”, ek sa do-lo zi la kré i koul partou. Marmay sé d’ pèt-a-rir ! Tikok i oi lo bèl léponz désou li. Li komans rod po astik Fernan déyèr li, soman tèl li dévir son tèt li oi figir Wistiti : li konpran kisa lotèr.
Tikok la pa pran la kolèr akoz Wistiti té in bon boug minm ! Epi in bon mèt dékol osi ; té i inm kas ti boi*, soman té i koné fé travay marmay osi. Li té i di aou : « Lerk i zoué, i zoué ; lerk i travay, i travay ! »

(Son tiktak* po bien amontré, zot i koné kosa té i lé ? M’a arkont azot sa prosin kou).