« Tansion, Tikok ! Alé pa tro vavangé ! La sézon zavan la rivé, la ! »
« Zavan » ! Toultan, kan i ariv desi la fin n’lané, Madanm Biganbé i koz de sa son garson ; Tikok i konpran pa bien kosa sa i lé. In zour, li la dmandé :
« Koué i lé zavan, monmon ?
– In zavan, st’in lespès mové zam, mon anfan ! Kan i ariv moi-d’novanm-désanm, zot i prominn partou dan la ravine, dann boi, dan zandroi pa frékanté…
– Bin, pokoué zot i mars konmsa ?
– Bin, akoz zot la fin, mon anfan ! Zot i sa rod lo frui po manzé. Souvandéfoi, po manz lo frui, zot i kasièt an ndan. Sé po sa, i fo pa alé dann ranpar, rod zanbrozad, franboiz, figé, tousala… »
Tikok la pèr zavan. Sé po sa, li évit manz zanbrozad, franboiz ek tout "ravaz" nana dann boi.

Soman, n’in kou, Tipol ek Grozil i vien kri ali po alé bingné la ravine. Tikok i sava… Kan la fine bingné dann Basin-blé, Grozil i di :
« Anon rod letsi dann lilèt gramoun Maniel ? Sa va aranz in pé la bous ! » 
Tikok i vé pa, mé po fé l’ vayan, po montr demoun li la pa pèr, li di :
« Lé bon : anon ! »
Mé oila pak kan li lé an lèr pié-letsi, in brans i krak sou l’poi Grozil, i rod kasé ! Sové Tikok i drès toud’in-kou desi son tèt, li kri : « Mondié ! Ala zavan la débarké ! » ; é, dan lèr, li sot dann fon, li démi son bra !…
Kan Tikok la riv son kaz, Madanm Biganbé la frot son bra ek lalkol kanfré, é son dérièr ek… in bon fouèt pès !
« Va mont aou avaz zavan dann boi ! Sirtou dan la kour dmoun ! Va mont aou dézobéir out monmon !… »

Christian Fontaine