Kaziman-dir, koméla, bon-pé marmay nana lo zé po zot amiz zot tan : sépa ti kamiyon, pistolé, tikaz, nounours ; sépa poupèt, baba, tousala… tout lé fané an gaspi* dan la kaz, dovan la port, dann la savann* partou. Lé ziska in raskèr* oir sa !
Dann tan Tikok, té pa parèy : marmay té i gingn in nti zafèr po Tinoèl* orksa po zourdlan (ankor la pa tout : té konmsik in nafèr Tinoèl té i fé proférans). Tèl té fine gingn kado (sov* in ti trin an boi, sov in baba, sov in siflèt balon, ou-sansa in ti kordéon a-bous) la, té i zoué dé-troi zour ansanm apréla n’asé ! Monmon ek gromèr té i trap lo zé, té i toiy* sa bien minm té i anmas po l’ot Tinoèl apré. I fé k’ tout lané marmay té oblizé démerd zot kari* po trouv in lamiz-tan.
La, té i zoué fotbal èk la boul sifon, ou-sansa ponplémous èk vavang. Zot té i fagot in toupi an boi gouyav èk in nay* an point-a-plans la tèt koupé, té i fé roul sa èk la li’ng* gatir* soka. Episa té i fé dé-troi parti loukouri, loukasièt, loukoupé, la ronn-di-migé, marèl, kadok, tousa-la…
Tikok, lo zé li té profèr, té zoué sarèt : li té rod ali in boit sardine, té i pers lo trou dé koté épi dovan po fé lésié* ek bankar*. Epila, li té i klout boit siraz èk lésié. Po fini, an-éfé-d’ bèf* li té i rod in bout rakèt, sinonsa in nti zak tann. Ali :
« Wo…i ! A… wo ! yak wo ! », li té aminn sarèt partou èk voyaz kann, té i sa tabisman, voyaz do-boi, té saroy sa lizine létivèr, bal maï po vann, tout. Pli malizé minm, té po trouv la rou. Boit siraz té parèy korn lapin parapor domoun té i koné pa tro soulié. Té i fo aspèr dis-kinz dimans dé-ram* po dénous* in boit siraz vid.
Parlfèt, lèrk té i ariv po bros soulyé po la mès, Tikok té i pas lo pré*. Li té bros, té bros, té bros minm… té i fini pi brosé ! Kalité gob* siraz sa té i anserv, baya ! Té i mèt po fé plézir. Lé a konprann osi. Li té si-tan présé dévid ti boit-la po fé la rou sarèt !