Toultan, kan i ariv zour-d’lan, Tikok i sa « dmann » son fami la bone ané. (Tikok i souèt pa li : li « dmann » !) Li sava partou ek son tonton Tifrinm, son tantine Babèt, son kouzin Gaston, é tout, é tout… !
Soman, sak li profèr dan tout, sé son parin Bébèr. Pars lézot i done p’ali gran soz : i done ali in savonèt, in mousoir, in siflèt balon…, anfin in nti kouyonad, konmsa ! Son parin Bébèr, o kontrèr, i fé in kont ek li. Dabor inn, i invit ali po manzé. E a tab, ankor, siouplé ! (Dabitid, Tikok i koné pa la tab : li manz asiz si son nti-ban, son zasièt dan son min) Ek sa, gro-marinn Fani i fé aou in kari ! Sa lé bon ! Sa lé bon !…
Oui, la kaz parin Bébèr, kari lé bon, konm di kantik légliz ! (« rendez grâces au Seigneur, car il est bon ! »). Po manzé nana : dori d’ tab, kari grin-zonn ; la viann volay péi, bien rédui, ek sou-d’palmis an-ndan ; rougay tomat…hum ! La bous Tikok i fé d’lo, kan li mazine sa ! Po asévé, parin Bébèr i sava kas letsi – letsi nilon – letsi bien roz, bien mir ! I mèt si la tab, po désèr. (Rienk po lokazion-la, Tikok i manz désèr !) Alors, dmann pi si Tikok lé dann son bèr !…
Mé, lé pa tout, ankor ! Kan la fine manzé, boir kafé, tout… Tikok i sava dvan son parin ek son gro-marinn, i di : « Parin Bébèr, marinn Fani ! moin la dni dmann azot la bonn ané ! » Alors, son parin – son zié i mouy é i bri ! – i sava dan la sanm, i rouv larmoir, i trap in gro paké anbalé, i port po Tikok :
« Oila po ou, mon fiyo ! Sé parin ek gro marinn i done aou sa ! Mé, tansion ! I fo bien travay lékol ; obéir bien papa, monmon, mèt dékol, tousa-la !…
– Oui, parin ! » Tikok i di. Soman, son lidé lé plis si l’ kado k’ si otro-soz ! Li trap kado-la, di « mersi », li tourn li vir in pé, épi « vloup ! », ali son kaz ! Présé po oir koué nana dan lo paké !… So zour-la, navé in gayar " trin alestrik " ! Tikok lété fièr ! La tèr té port pi ali !…

Christian Fontaine