Dominique Di Piazza i zoué la bass, son laz li la fine tras son somin dann monn jazz. Anparmi bann gran zouar, li la may ansanm partou dann monn nana John Mac Laughin Trio. In group lété nu La Rénion dann zané 1992, koté Château Morange. Zordi Domiinque Di Piazza i arvyin par isi ansanm dé zènn zan : in brézilyin Nelson Veras, ti prins la gitar, é Matthieu Chazarenc in batèr jazz. Lé dé la fine zoué antrot èk Kér Ourio. Zot i tourne bokou dann l’Europe ansanm bann pli gran mizisyin jazz.
So bann mizisyin i koz minm langaz, promyé kou zot la fé in konsèr ansanm, zot té i koné pa zot. Astèr zot i mèt ansanm dopi dé zan, sirtou dann lambians bann club Paris. Nelson Veras èk Mathieu Chazarenc na ryink 26 èk 27 an, mé dann la mizik i gard pa l’az, i vèy solman la kalité. Ansanm, zot i aranz bann standar épi zot i invant zot prop mizik. Poinn diks ankor, mé in gran l’amitié, in gran plézir viv jazz.
Parlfèt, zot sé lo sèl plato jazz dann Sakifo Musik Festival, in plis bann zamatèr i sa va pa mankè. In plis pou fé dékouv sat i koné pa koman jazz i rèss gabié zordi. Ant zot, sakinn i fé koz son pèrsonalité dan son linstriman, tout la bann i rèspèk la valèr son kamarad kisoi nivo tèknik kom nivo lo kèr. Diran zot sézour La Rénion, lé troi i vé rankont bann zartis la mizik nout péï.
Lo PRMA, le Séchoir et lo Konsèrvatoir Jules Joron (Sin-Pièr) i anprofit zot lé la pou propoz bann mizisyin réyoné fé in Master class èk Nelson Veras pou bann gitaris, Dominique Di Piazza pou bann bassis, Matthieu Chazarenc pou bann batèr (1). Sa in bon manyèr pou kass lizolman bann zartis La Rénion. Dan bann Club Paris, so bann boug jazz i rankont domoun i sort partou dann monn pou zwé ansanm.
Solman lé troi kamarad i vé osi konèt lo gouté nou nana par isi, dann nout tradision, nout manyèr anminn la mizik. Pou sa zot i attann in bonpé lésanz diran lo Sakifo Musik Festival. Dé-troi group réyoné zot i koné déza, konm Danyèl Waro byinsa Meddy Gerville, zot la fine aprésié, la done azot anvi war plis ankor.

Eiffel

(1) Lo staz i komans zordi, riskap i rèss in plas. Apèl 0262-90-94-60.