(Page 11)

Bernard-Marie Koltlès. "Combat de nègre et de chiens". Lo batay lé dir. Li dir lontan, li di bonpé kozman. Ti pa ti pa lo mo i avans si in sène tou ni, komédyin déryèr. Lo komba i komans dousman, l’aksion lé dann kozman. Alboury (Kristof Langromme) i vyin rod lo kor in boug lé mor si shantié. In shantié fransé, dann l’Afrik. Horn (Jacques Deshayes) lo sèf lantropriz i fé tourn kozman kom li vé, minm li koné byin bat la lang, Alboury i débouz pa. Larzan i ashèt pa li. Minm lamour Léone, in ti fanm Paris la suiv Horn an Afrik, i sanzra pa ryin.

Kisa i lé Alboury ?

Kisa i lé Alboury ? Na pwin pèrson i giny done ali sak li domann. Kal (David Erudel) la fine fé disparèt lo kor, kor-la li la tié dann la raz, li la pilé épisa zèt o lwin, plizièr fwa, ziska in légou la ral ali lwinn d’son mémwar. Komsa li té san pi kor-là. Kal ki rod son shyin, Kal ki fé éksploz lo tèks. Kal lo tièr-fou ké Horn va pa giny protézé. Horn lé pa la èk sa, li sa rant an France, minm la rout li la komansé la pa fini, mé lo péï na pi larzan.

Kisa bann shyin ?

Dan so bann zistwar lo zom, Léone la suiv Horn ryink pou voir l’Afrik. Si Alboury na in dimansion mystik, zistwar Léone i may èk son vi davan. Komsi l’Afrik in péï èl la fini viv. In péï èl i rotrouv, sanm Alboury. “Combats de nègre et de chiens”, sé lo batay in kaf i vyin doman lo kor son frèr si in shantié fransé an Afrik. Sé lo batay bann shyin blann, Horn ki lit kont kozman Alboury, Kal ki giny pa santir inn sèl kaf, ki batay èk li minm, ziska pèrd la tèt. Tou kom son shyin i pèrd la tèt.

Tout dan lo tèks

Lolita Tergimina i zwé an fé dartifis pou inn Léone vizitèz an Afrik mé osi vizité par l’Afrik. Jacques Deshayes i ansort ali byin kom ki fo an vré gro blan, mé son kèr lé tann, li koné fo rann lo kor, Alboury i fé pèr ali. Kristof Langromme i léss tout la plas lo tèks, son boush i koz an parabol, in pèrsonaz kom fèy sonz, na pwin ryin i pran dosi. La piès i tourn ron, plis li va tourné, plis li va giny lélan. Nektar fine pran Bernard-Marie an boush, èk in pé kréol in ti-gine l’Allemand, Nektar fine pran Koltès an kor. Paré pou rouv in long parantèz dan nout swaré, pou lèss anou baré, la tèt é lo kor ki robomb.

Eiffel

“Combat de nègre et de chiens”, de Bernard-Marie Koltès, par la compagnie Nektar, au Théâtre du Grand Marché (0262.20.96.36),
Samedi 28 à 20 heures, dimanche 29 à 18 heures et mardi 31 à 20 heures.