Tikouti, sa lo non lo batavèk i zoué bob ansanm, lo non osi inn ti zoizo èk in gayar santé, mé sé osi lo non in Lédisyon, i vien sort son dozièm liv dann la koléksion “Kosa in shoz...”. Lontan, Tikouti i donn la min po fabrik le zouti i mank anou po amont lékol, la langé k la kiltir kréol La Rényon.
Lorans Daleau la réaliz niméro-la. Patrick Booz la fé le désin lo liv “Mi amène mon kaz / j’amène ma maison”, inn séri sirandane zinsèk.
Patrick booz lé né La Rényon an 1959, li la grandi isi-minm. Lontan li té travay dann linformatik. Dépi 23 an li travay dann minm bank. Po le désin, la pintir, li la form ali par li-minm é son gouté lé fré, lé klèr, lé aéré. Lo bann désin i avans kom in sirandane po lès aou mazine lo répons.

Kréol(s), Fransé, Anglé, Alman

An plis ke sa, na poin dé liv koma, lo paz i rouv an troi, dovan ou néna lo sirandane marké tout bann grafi rénioné, épi an fransé, par dérièr trouv lo répons an Kréol, an Fransé, an Alman, an Anglé. In gayar pilon la lang. Po lër, an atandan in sèl lékritir po tout domoun, Tikouti la ansèrv po lalbum-la le kat grafi i giny pa triké zordi. Lo promié i suiv lortograf fransé, sé lo promié fason Boris Gamaleya lavé montré dann “Manir po lékol zordi” (1974), épi na osi Lékritir 77 Boris Gamaleya minm la mèt anlèr. La grafi KWZ (1983) lé pa mi parkoté. Anfin, an pli bèl, ou giny lir Lékritir 2001, Tango i propoz. So manir fé lé vréman gayar akoz ou giny konpar bann grafi ant zot, konprann koman zot i avans, rékonsili aou èk inn dé, éséy voir kèl i tourn plis ron.
Alos kosa in shoz ? Devine-devinaille... in liv lib kom l’èr, na poin laz pou lir.

Eiffel