Oté, non, vréman té doss, demoun va kroir amoin mantèr. E ankor, mi diré navé poin asé demoun le premié soir. Vandredi soir, mounoir ! banna la mèt lanbianss dann La Grann Halle Jeumon. Sinn-Ni la grèn maloya. Demoun té là, mé i di samdi navé plïs ankor. E là ! plato gran shoi, plato “de luxe”. Sat i èm maloya i mank pa sa po rien. Azot, po Christine, la pï bézoin dir koman son voi i ral aou loin mèm, koman son manièr amèn maloya i angant le kor. Normal, i kraz maloya. Demoun té danss. Oblizé. An plïs, Nadège Ichambe nana inn voi le kër i port. Bann zwar dérièr i done paké. Odilon la fé in solo djembé, dan mon somèy téi rézone ankor. Mi koz pa Vincent Philéas, sat là in zarlor. Mi di respé. An gran louvèrtir, Salem Tradition la fèt son di z’an, dann gran lanbianss. Lavnir maloya lé asïré, lé dann la min Christine, lé dann la min Salem Tradition.

In lomaz po lantant dalonaz

Ek Salem Tradition, i fo viv kome an fami. Sé in lantouraz kamarad, soman i tonm kome fami, fami maloya. Daborinn, avann rant dann bal, navé in lamontraz danzéré dési Salem Tradition. Sa bann marmay la kour mèm la fé. Marmay la kour, kome Christine Salem ! Mi mazine ankor dann tan L’Escobar té ankor là, bann gran kabar navé dann Moufia. Sa osi i fo rann lomaz. Christine la fé. Koté, lespozision navé in bar san lamandoz. Boir aou tout kalité zafèr, sof lalkol. Nora moin d’mor dési la rout. E là, ou retrouv Stéphane Garcia, in bon dalon la done la min bann group maloya dann tan li té okïp l’Escobar. Bann gran fèt, po Alin Péters, Christine Salem la pa loup alï in brin lao Moufia. Demoun té mank pa osi in lokazion profit in bon maloya Salem. Alala i artrouv tout la bann po fé la fèt ansanm Salem Tradition. Mi profit osi po tir shapo ba po Mike, in sonorizatër i suiv Salem partou La Rénion.

La voi bann fanm

Oté, ki koné pa Nathalie Natiembé ? Sa in fonnkézèz, in gran shantèz, in maloyèz sérié. Ki koné pa Laurence Beaumarchais ? Sa la shant sanm Laope, i shant jazz, i zwé dann téat, i rakont zistoir. Mounoir, dé fanm, la pï bézoin mi prézant, tèlman lé sïr sa i done la voi po La Rénion. Là, nana in bann voi fanm Christine anparmi. Vèy pangar mounoir ! i obliz le respé. I pran finnfon dann kër, i shap pa. Mi kroi, sé le pli gro kado soiré-là, in voi fanm demièl, in voi fanm bandé, in voi fanm la maliss. Mi espèr bann rénioné va gingn voir azot, isi La Rénion, é osi partou si la tèr. Fèt là, té sitant danzéré, té falé suiv lé dé zour. Francky Lauret la parti le dézièm soir. Antouka, sat la manké, i paré zot va regrété. La fèt té danzéré ...

B’Jalah