Èske zot i koné na 200 zan de sa, an 1811, na zésklav la révolté isi Saint-Leu, tèlman zot té gagn pu suporte la fin, la doulèr, le kou, la manièr bann mètr té kruèl é sovaz èk zot ?
Èske zot i koné ke sèt ané i fète Lané Élie ?
Kisa lété Élie ?
Élie té in konbatan Rényoné, in zèsklav ke la amène lé zot pran zot libèrté é arète avèk la soufrans, la maltrètans, lo mépri.
Élie navé pétèt 24 an, mé pa plis, é tout son bann kamarad osi.
Avèk apépré 500 zèsklav, fanm avèk, li la désid atak lo bann Blan, an surpriz, èk galé, la pios, boud boi.
Mé zot té trahi par Figaro, inn ot zèsklav, ke la koni sak zot i sa fé.
Akoz Figaro, Élie èk son bann kamarad la tonm dann pièz bann Blan, sou bal fizi.
Mé sak i fo voir, sék Élie la pèrd la batay mé li la pa pèrd la gèr. Li la gagn fé pli zenou lo bann gro Blan, piske gras ali nout bann zansèt zèsklav té mié trèté, zot té mié nouri.
Fo pa nou oubli sa, fo pa nou oubli nout zistoir, fo pa nou oubli nout listoir sé in listoir la soufrans.
I fo nou montr nout bann zansèt la sakrifié zot vi pou nou, ke nou oubli pa zot. I fo nou kontinué pans a zot, é osi pou nout zanfan, pou zot voir zot na in passé ; komsa zot lé pli solid dan la vi.
Fé plézir anou, fé azot plézir, vyin donn anou la min pou fé konèt nout listoir.

Le KLÉ (Kolèktif Lané Élie)