Apèl, si zot i vé, pou moin pèrsonèl in sor, in fanafout, in léspri défalké. In lanboulkidi, in sorsèlri, sansa bann mové zam épi tout kalité zanbèk in pé i gingn mèt déssi nout shomin... Zot i pé si zot i vé domann mové sorsié pou anklav mon tèt, fé mont mon gaz, fé pèrd amoin l’èr, rann amoin éstrévagé... Mi prévien azot, zot i gingn ar pa fé arien kont moin, pars moin nana in garanti in vié gramoun dann syèl la kado amoin. Sa i protèz amoin bien, vèy pa !
Dopi isi, mi oi zot ! Mi oi konm zot i tourn z’ot figuir si koté pou rir an misoukant. Mi oi bien zot l’apré mazine moin lé tok-tok, moin na konm in kankréla dann plafon, moin la boir pétrol, kaziman moin la pèrd la boul. Mi oi bien zot l’apré di, moin noré pa koz konmsa si moin té, kansréti, moindroman, in pé instruiyé.
Akoz, zot i kroi bann moun instruiyé la poin in doz la kouyonis dann z’ot tèt ? In ga i sort di amoin, lo prézidan Sarkozy la fé in prosé in moun la fé poupète èk li, suivan in téknik vodou, avèk plin pti zéguiy pou pik son kèr... I prétan lo prézidan la di son lavoka fé in prosé, dabor pou domann lo boug in bon moné, épi pou fé ramas plis vin mil poupèt, la mète dann komèrs pou vann.
Tribinal la di li may pa èk sa... Moin, pèsonèl, mi kroi, Prézidan-la, la gingn vréman la krintiv. Fransh vérité ! la krintiv, in boug instruiyé, pou in poupèt ? In spès baba shifon. La lé bèl la !

Justin