Dans la savane, le grand patte Issa i marche, i marche, i marche. Issa lé tracassé, « a cause compère Léber la dit sa Pays le mort ? ». Li commence moude poive. Plu que la journée i avance, plu que li la peur : i entann pu riyen, na pu in zoiseau i chante, na pu inn i souf la brise dann zerbe.

Issa grand patte i commence regrette son ti village, quand soleil té i sar dodo, li magine marmaille l’après joué bataille, li entann calou dann pilon, tourterelle l’après roucoulé, toute sa la. Jusqu’à le barn cri son ti mère on dirait lé moin terribe que ce l’espèce silence i fait peur, tellement que li entann batte son cœur. La nuite l’arrivé : la point Molle, la point la lune. Issa i essaye dormir, i gaingne pas. Quand li fini par gaingne sommeil, li fait mauvais rêve.

Enfin grand matin, le marmaille i lève, i recommence marché, marché, marché, dans ce l’espèce pays i ressanm pas riyen, la point riyen, i entann pas riyen. Onze heure d’matin, li arrive dans in ti village, na jusse deux trois cases cassé, on dirait la point personne. Et voilà pas qu’i tonm su trois vieille femme ; zot i marche sanm in baton et zot i sar rode l’ombrage sous in gros pied d’bois. Le trois femme i assise pou écoute Issa raconte son zistoire, toute son misère èk son voyage. Pou fini, li dit azot li l’après rode inn carafe pareil sa qu’li la cassé, pou li rente sa case, pou li retrouve son village que Ii regrette. Banna i dit ahi : « Premier coup, ni oi in zenfant d’moune na courage rente daim Pays le-mort. Na aide aou, Issa grand patte, seulement chemin lé dur pou retourne daim Pays de moune ».

Le trois vieille femme i donne a li mangé, i donne a li de l’eau pou boire. Quand la fini, zot i donne a li trois calebasse i rente inn dans faute. Boanna i dit : « Prend ce trois calebasse pou rente oute case, chaque calebasse va serve aou mais in coup seulement. Comme sa, ou va gaingne finir oute voyage. Allé là bas côté soleil i sar dormir. Quand sra fine passe sept jour, ou casse le plus petit calebasse. Après là, ou fait sa qu’oute destinée i dit ». Issa grand patte la regaingne l’élan, banna la donne a li mangé pou porté èk de l’eau pou boire. Li recommence marché, marché, marché côté soleil i sar dormir. Quand la fine passe sept jour, na pu riyen pou mangé, na pu riyen pou boire. Li la faim, li la soif, li attann soleil i sar dormir pou casse le ti calebasse, comme les trois vieille femme la dit a li.

Li jette le ti calebasse à terre, i casse en mille morceau, i vole en l’air dann ciel, pareil voul voul, i vole, i vole, i vole, le jour com la nuite i file, i file, i file, on dirait in instant la fine passe quate cinq an. Issa grand patte i retrouve a li inn place li connaît pas du tout. Côté inn ti case à terre là même, a là li oi son maman, la pas son ti mère, non, son vrai maman I’après fait cuit mangé.
Son maman i oi a li arrivé, lé pas étonné du tout, comme si Issa té sorte rale la pioche daim carreau manioc à côté. Le cour Issa i batte, i batte, i batte, li gaingne pas dit riyen.
Son maman i donne a li mangé, i amonte a li son lit pou dormir, i acoute son zistoire mais comme si li té in l’étranger. Issa la pas étonné, li plère pas, li lé fatigué. Li tomn su son lit et li dort.

Quand soleil i lève, son maman i réveille a li, i mette deux trois zaffaire dans son bertèl et i dit ah : « Issa, i faut ou sava. Moi lé content ou la ni oir amoin, mais lé pas possibe garde aou. Ala oute deux calebasse èk inn carafe pareil sa qu’ou la cassé. Comme sa ou va fait pardonne aou, ou va ni à bout retourne dans out village, là bas daim Pays de Moune ». Issa grand patte n’aurait voulu resse là même, côté son maman, mais li la compris i faut li obéi, il faut li suive sa destinée. Li reprend son chemin côté soleil i sar dormir. Li marche, li marche, li marche, deux trois jour jusqu’à li gaingne pu deboute. Li la soif, li la faim, li lé fatigué. Ah si li té gaingne retrouve la grann rivière, ou sa qu’Pays le mort i fini !

À suivre...