Oté banna ! nana gayar tèks kréol La Rénion. Dawar zot la fine lir in tralé liv, fonnkèr an poundiak, bann sïper fonnkézèr. Jean-Paul Cadet, anparmi. Alï, lï fé rèv anou, son bann tèks nana touzour in ti gob, in vizion nout sosiété, in moukataz, in forss osi. Jean-Paul Cadet i ral anou dan le monn le komandër, sat i komann le moun et le Monn. E si lété vré, si in zour, kozman fonnkézèr téi trouv son vré. La pa lï profèt, li sar voiyaz dan Linn. Son fonnkèr nana osi in moral, in kalkïl po nout tèt. Antouka, kome le rekin, ni vë pa mal-de-tèt. Tourn sa bien dan zot tèt marmay. Kosa ? Zot i koné pa Jean-Paul Cadet. Si zot i shant « Dann la ravine, dann kèr solèy, mon kèr i grèn konm kaskavèl ». Sa la ékri po détroi gran zalor, Baster, Kayambé, é konsor. Ziska Danyèl Waro la shant son shanson èk Léïla Négro.

Bbj

Komandër

MON BATO
Mon bato i vog, i vog
Dan lo batman lame la mer
Mon bato i vol anlèr !
Bato do ri ? Bato Pétrol ?
Bato kari ? Bato lalkol ?
Dan lo batman lame la mer
Mon bato i vol anlèr !
Bato lame razoir la koulé.
Mon barb i pouss konm an lichen
Dan karo-brann lao la Plaine
Dan lo batman lame la mer
Mon bato i vol anlèr !
Oilà nou-là dan la mizer
Bato do ri la koulé
Nu gin-ye pu not manzé
Dan lo batman lame la mer
Mon bato i vol anlèr
Napu do ri po mèt sou kari
Bato kari la détourné
Po désharzé Zétazuni

Jean-Paul Cadet

Inn-dé tik-tak an plis

Soley
Soley, kan la levé, la di bonjour la Ter
Sadlà la pa réponn pars el lété tro pri
Tro pri dan koué aster, pri dan in ta-d-zafer
Zamé va trouv lo bout si inn bone foi po toute
Vi vien pa tourne aou anplin sou la limièr
Anplin dosi son tèt kan l’ariv lèr-d-midi
Soley la di li pas po souèt bonapéti
El té dan son zasièt po manz son gazon-n-ri
Koué la pas dan son tèt po li pa di mersi
Aforstan fer in fion ek in moune lé pa là
Soley la di li osi li lé pi là ek sà
La désann, la désann po li koul dan la mer
Rokin kan li oi sà, la ri konm in boug fier
La trap son gro tierpoin, la malis dann koko
Po giz tout son bann dan pointi an lam-kouto
La atann, la atann ziska lo soir sizer
Son-n-ti bous i féd-lo asiz dosou la mer !
Lannmin mi trouve rokin la ni po pas radio
La min dovan son bous, latèt té angaroté
Konm in marmay lékol ou la pri an défo
Vi d’mann koué l’arivé, li ve pa tro kozé
Moin la parti la plaz, moin la d’mann bann zoursin
Mi di : Oté Marmay kosa l’arive rokin ?
Konm in sel moune aster tout la bann la réponn
Manzé lété tro sho, la dan rokin la fonn

Jean-Paul Cadet