Kom nou la kozé, ala an dé mo nout souvnans lo lazaré ravine a zak.

Sanm lo Komité Éli, nou la désid fé in souvnans si dé zour, lo 24-25 aout, si landrwa minm ousa nout bann zansèt la pasé an karantène po romèt azot dann kondision po èt balansé dann la masine infèrnal é imoral i apèl lèsklavaz èk langazis.

Nout mision sé fé konèt tout bann Rénionèz Rénioné nout zistwar, po nou pran konsians dann kèl larlik nout bann zansèt la viv é koman la rézistans té organizé, po ké lo somin nout libèrté lé touzour éklèré po tout sak lé la é sak i vyin apré.

Dann lo ronn-kozé, nou la kozé in bonpé si linportans po fé révèy an nou inn Larénion fièr, dobout é rèsponsab. Inn Larénion ousa sé nou i désid si nout dèstiné, po in méyèr partaz de tout nout risès.

Néna plizièr fason rann in lomaz nout bann zansèt. Lo fason lo pli gadianm, sé pran nout péi an min, pran komann, okip la dirèksion zafèr nout péi.

Somin la souverèneté la, va mèt nout tout an fas nout rèsponsabilité vré ; i sava transform anou, va fé konprann nout tout, tout la risès nout péi néna po nou.

Lapa nou la swazi nèt dann péi la ; sé lo péi la swazi anou ; réspé po sa !

Zourné la i fé rapèl anou osi lo 23 aout zourné intèrnasional la trèt négriyèr, é lo 350èm anivèrsèr la nésans nout pèp : novanm 1663-novanm 2013, i fé plis 300 lané nou atann é nou ékout lo bann mèt kolonial fransé le tan lariv lèr po antann é konprann la vwa nout pèp.

Néna plis 300 lané, nout zistwar lé ékri par lo sasèr o sèrvis la profitasion. Lariv lo tan èk lèr po sé nou i ékri nout zistwar an dalonaz sanm tout lèspas loséan indyin é ayèr po lo byin nout nasion Larénion.

Anfin, zourné souvnans la, la pèrmi anou de fèr inn ti pa an plis dann nout mèt ansanm po rasanm anou ankor pli for po lo byin nout zistwar èk in meyèr zordi èk domin, po nout pèp i dovyin inn pèp gadianm èk bonpé firté, risès, dèstiné ; konsian, konfian, for, dan lamour, èk linité, po la rèsponsabilité èk lo partaz.

Ala lo déroulman nout laksion :

• Samdi 24 aout 2013 : 8 èr lo swar, vèyé.

• Dimans 25 aout 2013 : 8 èr lo matin, lakèy.

8 èr 30 - 9 èr 30, vizit gidé.

9 èr 30 - 10 èr 30, lomaz zansèt, dépoz flèr dann loséan.

10 èr 30 - 12 èr 30, ronn kozé.

12 èr 30 - 14 èr 30, partaz manzé.

14 èr 30 ziska 7 èr lo swar, kabar sanm : Léa Varon, Amba, Ingrid Varon, Maronèr Koméla, Renésens, Dalon Sinoi, Sofi, Kréolokoz, Zandémik, Kaizzlaman, OG 97 Kaf, Zarlor, Kayanmbé.

Nartrouv,

Maksimin Boyer,

Prézidan Komité Éli