Wilhiam Zitte et Limazinèr Fèt kaf

Konbyin tèt kaf dann la tèt kaf-là ?

10 février 2005

Nous avons consacré deux articles à l’exposition itinérante Limazinèr Fèt Kaf. L’Espace de recherche et de création en arts actuels (Lerka) a répondu à une commande de la ville de Saint-Denis dans le cadre des festivités du 20 décembre. À cette occasion, du 18 décembre 2004 au 20 janvier 2005, 10 œuvres de l’artiste peintre Wilhiam Zitte ont été affichées à l’arrière de 10 bus urbains. Un dépliant vient d’être réalisé par Kamboo pour garder une trace de cette opération originale.

(Page 9)

Konbyin tèt kaf dann la tèt kaf-là ? Dopi sak lé la-o dann la tèr rouz piton anlèr. Zitte konm in boug i vé sharoy la mèr, kom zistwar marmay i vé dévid loséan sanm in kokyaz. Zétwal kaf navé pwin dann siel, ala konstélasion, saplé zartis zordi. Tèt kaf an galaxi. La pa di la gèl. La di domoun. La di vizaz kontnasion tiré dann moulal, dékoupé dann fénwar loubli.
I rogard pa ou ? Ou la pa vi, ou préfèr pa war. Ou wa minm pi ou. Solman tèt kaf là i véy aou dann zyé. Zordi tèt kaf la sort marron. Lé pi dann la kal mizé, la pa dann tinèl bordmèr, ni dann légliz zindyin... Marron la sorti pou dsann si la vil. Si lo kof loto, si la zèl, si kapo, bann guétèr la rouv somin. Astèr, ti sort pi dann somin Sinn-Ni, ti kour kan lo bis i pran tournan, pangar out régar i tonm dési.

Kaf la sort maron

Domoun i wa pa - i vé pa war ? - zot-minm. Sé-tan si motèr lo bis i ronf paréy maloya. La pa di zanimo. La di domoun. La pa di zésklav. La di kaf. La pa di yèr, ni zordi, ni domin. La di toultan, la di tout. La pa di bébèt, la di Zanar. La pa di granmèrkal, la di Lèr Kaf. La pa di vilin boubou, la di in zoli pli zoli k’in boté. I di pa métis, i di batar. La pa di kaf in koulèr, la di kaf in manyèr viv kréolité. Détrwa i di néna kaf blan. Oubli 20 désanm la fèt kisa. Kèl Ombline pou anbar soléy ?

Kèl maronaz ?

Détrwa i dir, sa la pa kaf maron sa. Kèl maronaz ? Out tèt kom si in zafis koboy promené partou ? Kèl maronaz kan fo rant dann lo park kom anzolé ? Kèl maronaz ? Kan lo tan va nir va déshir bann figir pou mèt in piblisité ? Zistorézon maronaz dan lo tan. Zitorézon piblisité maroné. I vann pa ou ryin tèrlà. Ou rod in pint lidantité ?
Détrwa i dir somanké Zit in missar, i koup lo kaf dann papyé. Mové lang mi di atwé. Mové lang na pwin léspri, dawar pou zot sré myé pinn an gran bann gouvernèr ? La fine fé.
Mé ousa twé la fine war in kaf èk tout son dinité ? Konbyin la tir portré san rod lam bondyé ? pintir Wiliam i zèt pal o sor, i fé lèv léspri, i travay léspri. Koman ou angard ali i dir koman ou gard amwin, koman ou rogard aou. Lèv lo zyé pou war out rasine si ou viv la tèt anba.
Amwin mi marsh dovan déryèr, mi fé zako pou giny zimaz-la. 5,6,7,8,10,14,31, bobine, mi koup antravèr Saint-Denis, pou giny la lyn lo bis.

Eiffel