Dan “Té arèt marsh tou nu don !”, Sham’s li invit anou bat in karé Sin-Ni, dann salon dépité Ventroux. Sa la pa giny manda pou son zidé don. Na pwin in lambision pou l’péi akoz li wa pa pli lwin son prop lintéré : giny gro loto sofèr ék GSM kan li sa ni minist. Rozman sa in blag, i ékzist pa “politishyin” makro-la La Réynion, sinonsa péi kapot direk dan fon kanal...!? Parksa. Ventroux li lé touzour an grinn ek son fanm i promèn aèl longèr d’zourné an ki tou nu dan la kaz, i fé son léspo Flore et Halle dovan tout domoun. Té, i fo komprann aèl osi, 38 dégré latitid i mèt son kor an lo... Minm si i wa
sa la pa in gran lespri non pli, la pa lèss son karaktèr dan fon larmwar èk son rob. In fanm la maliss èk lo sharm mi di aou, li mèt piblik dan posh èl na pwin. Aèl-minm i koné koman fé tourn domoun an bourik, koman shavir lo zom. Kom lot makro ankor, lo mèr Hochepaix la ravin Shapot, li arvyin fé la piont vant atèr dovan dépité Ventroux, aprè la trèt ali an shyin pandan zéléksion. Na osi le doméstik Viktor, témwin tout bann sirk nana la kaz, san tro pertirb alu soman, épi lo zournalist Romain li ariv la fin pou in tombé lo rido dan lo rir ankor... Mi di pa pliss, sinon atann pa la fini pou alé war par zot minm. Sham’s i voulé alé pli lwin dann délir, la pa zoué mentèr, la don paké minm. Ou sa artrouv in takon klin d’èy La Rényion, in kozman kréol byin rantré èk komédyin i mèt azot an kat, zist pou fé rir la boush.

Estéfany