- 1744 : Mussard i décide monte Cilaos. Mais li fait pas comme dann temps Labourdonnais, li rassanm in l’équipe 10-12 boug, i marche plus vite, i fait pas désorde.

- Avril 1744 : Mussard i monte la Rivière Saint-Étienne jusqu’à Bras-de-Cilaos.

- 14 avril : zot i tonm su in marron l’après chasse cabri, zot i tué le boug.

- 15 avril : en l’air dans in l’ilet, zot la trouve in village navé 6 case, toute té vide. Na riyen qu’inn fanm lavé resse là. Quand elle la rode chappé, bonna la tué ali.

- Octobre 1744 : zot i arrive l’Ilet-à-Corde, zot i oi deux fanm l’après sauvé, zot i criye arrête, mais bonna i écoute pas, i file dans la pente. Zot i gaingne trape inn vivant, l’aute zot i tué.

Zot i trape Marianne

L’Ilet Apère zot i tué in marron, zot i trape in aute, i appelle Marianne. Zot i promet Marianne i tuera pas li, si li amène azot camp de Pitse. Mais quand zot i arrive là-bas, na in marron en l’air i empêche azot monté, i fait déboule gros-gros cap su zot. Quand zot i vient à bout demonté, na pu personne.

- 1744-1751 : dann cirque Mafate, Mussard i passe soit par la Rivière-des-galets, soit par col Taïbit. Li trouve deux-trois camps l’îlet Roche-Plate, mais lé vide.

- Septanm 1751 : Mussard i tué Mafa, ou Mafate, ec son fanm Rahariane.

Toute la fine sauvé


- Octobe 1751 : Mussard i remonte la Rivière Saint-Etienne, li passe l’Ilet-à-Corde, Bras-de-Saint-Paul, Ti-Bénare. Li trouve in l’îlet nana 3 boug sanm inn fanm ec in marmaille 8 an.
Bonna i rode chappé. Li tué le fanm, té i appelle Souya, ec deux boug, Jean-Baptiste ec Grégoire.
Avann mort, Grégoire i dit Mussard l’aute côté-là-bas na encore deux camps, inn na 30 case, l’aute na 17.
Na 70 marron i resse là sanm zot famille. Mais quand la bann Mussard i arrive, toute la fine sauvé, le chien lavé senti l’odeur.

(A suivre…)