Dawar po tass manir rèss dann la tèt demoun ! Apré trant an dési la sèn lokal, èl i rèss anparmi bann zartis réyonèz demoun i yinm ékouté, épisa vwar dann sal spèktak. Là ! sé in vré lokazyon arkout son bann morso séga-maloya. Po son garson Eric Fruteau, sipor-là, DVD èk CD, i dwa may ansanm. Demoun va giny ogard son spèktak, ousansa ékout ali dann zot loto. Malgré sa, èl i arkoné ké lé pli doss rankont dirèktoman le piblik réyoné. Soman là, sé in gayar lokazyon partaz èk sak i yinm son travay. 23 titr an mizik, an limaz. Sakinn na le drwa soizi. San dout posib, èl i kontini koz dési La-Rényon. Episa, demoun i koné déza bann sanson-là. Kisa i koné pa “Dan l’temps longtemps”, “ça sent la banane”, “mon île” ? Parfèt, èl minm èl i di, son tit “z’enfants la misère” ké la sort an 1974 lé touzour dann la tèt demoun, ki ézit pa sant èk èl. Non-va ! la ka vwar le DVD po konprann k’èl i rèss dan le kèr bann rényoné. Episa, in ta-d sirpriz i atann azot. Dann DVD-là, mé i giny osi ékout ali dési lo CD, détrwa zarlor la mizik lokal la vni rann aèl omaz. Anparmi, i trouv Dominique Barret, Joël Manglou, Thierry Gauliris ou ankor le Duo Célimène. Demoun va inm ankor plis... dawar !
Kosa fo dir ankor ? Nana dé duo va pa lèss demoun dann vavang, inn i réini Guillaume Legras èk sa fiy Cassandra. Lot i tourn o natirèl, Éric Fruteau i sant po lo promyé fwa èk son moman. Ah wi ! Tan-k nora solèy, nou va dir Jacqueline Farreyrol i tyinbo fanal in zanr nout mizik, kinm tanza-ot i roul maloya.
Po tout sat lé intérésé, i giny trouv son doub-kofré DVD-CD... po vin léro apépré. In travay fé ansanm Discorama production, Digital Studio, èk la partisipasyon lékip l’ODC.
A ! sak i fo pa oublié, sansa nioré, sé-k byinto èl sora dann prozé Joël Vigne po sant po la pé dési in morso Frédéric François. A ! i étone... minm son garson.

Bbj