Samedi, dimansh, bann rénioné i èm alé an parti, an fami. Demoun i èm marshé po refé le kor. D’ot i èm aranz zot boush èk in gayar kari préparé dan la tradision. Oté, ala in bon zafèr po fé week-end i ariv. Alé Hell-Bourg, nana in festival i trouv pa partou La Rénion, le premié festival maronaz.
Nora sobatkoz po konèt ankor plis listoir maronaz La Rénion, nora kabar, lamontraz pintir, skiltir, désin, tousala. Samedi, nora osi in randoné, si koté Piton Anshin, po konprann lespass natirèl é kiltirèl La Rénion. Si zot i vé dékouv Hell Bourg, listoir le bann kaz kréol, tout son kiltir prop ali mèm, nana in ti rali patrimoine po aprann tout, ranpli in kou not tèt là. Partou dési Hell Bourg, nora in lanbians. Alé !
Oui, soman ogard pa lespri festival-là. I revandik pa rien, soman i amont anou koman bann maron l’aport in gran par dan nout kiltir. I sifi pran an kont bann non léo La Rénion. Soman, n’ankor po travay dann la rekonésans le maronaz. Dawar zot mèm va aport rekonésans là !

Bbj