Léspri, lo kèr, lo kor té la samdi swar Téat plinèr Sin Zil pou lomaz Zarboutan nout kiltir Gramoun Lélé, la désot la vi nora dé z’an d’sa, mwa novamb sèt ané. Son zanfan, son bann frèr, son madam, son famiy muzisyin, tout té si la sèn pou kraz ansamn maloya malagasy Gramoun la lèss anou an léritaz. Té in gayar lomaz, mé té osi in mésaz pou ni oubli pa lo gran kado Julien Philéas la done anou, pou ni oubli zamé banna la batay pou fé viv nout kiltir. Noré té fyèr war son bann zanfan ral lo fanal èk lénerzi, lo kèr, tout la fors la mizik la nouri azot dopi tan pti. Sa pa solman in musik, sa in lédikasyon, in rédyon pou trass son somin dan La Rényon béton kom di Danyèl.
Ti Loun, Pinpin, Zanzibar, Manyan, Tambours Sacrés, Ras Mélé, Firmin Viry èk Danyèl Waro... : tout domoun la défoulé, la pil tout zot gayar pou Gramoun. Pou Baptisto, la mèt an plas la swaré, lé sir, lespri Gramoun té samn nou. Lé vré, zétwal la bril for samdi swar. La di tout kan i di falé pa mank sa. Zist in afèr i fo rapèl kan minm : Gramoun Lélé, sa pa solman in mizisyin dan nout mémwar, sa in sanzèt pou tout réyoné.

 Estéfani