Kisa ou lé ?

- Mi apèl Pascal Léani, mi sort Sin-Ni, é mi zwé maloya. (sourire)

Kosa la fé komans aou le maloya ?

- Mon bann frèr té zwé la mizik. Moin té ankor ti marmay. Banna té fé pa maloya, té zwé gitar. Moin maloya, moin té akrosh pa tro, moin té trouv sa bizar. E poitan, la trap amoin, la ral amoin, la fé konprann amoin, sa lé po ou sa. Astèr, sé mon vi, i fé parti mon vi.

Ou fé maloya, soman ou voi ali tradisionèl...

- Oui, ni fé maloya tradisionèl, apré nou fé inndë repriz. Nou gard touzour la tradision maloya, sat nout zansèt la doné, la lèss po nou. Aprésa, mi aranz ali, mi armèt inpé pli joli, po mèt ali plis anlèr.

Ou la zwé maloya dan in bonpé group. Ou la komans dan kèl group ?

- Moin la komansé ansanm in dalon, an-ba la rivièr Sinn-Ni. Sé là la kolé. Té désann, té amèn in kayanm, in djembé, shant in pé. Kamarad navé roulèr ansanm li, té may in pé avèk, trankil. Apré, moin la parti an Frans. Sé là-ba, moin la konpri kosa navé po fé. Apré moin la zwé dann Ras Maron, Zenès Maloya, Zangoun, Matalon, Zorkri, aprésa moin la rouv Digdig Maloya.

Pokosa Digdig Maloya ?

- Digdig, i shatouy, i fé plèr aou, i fé tout. sé la joi, lamour, tout santiman dan la vi in moun.

Out maloya lé répïté danzéré, dir mèm, ritmé, in maloya i anvoy, pokosa don ?

- Li pé bouzé, li pé plané, li pé asiz, li pé tatoné, sé selon léta lespri ou lé dedan. Sé selon sat ou resan si le moman. Kan mi shant maloya, moin lé dan in ot zafèr, moin lé in ot moun.

Out maloya ou nana roulèr, bob, kayanm. Par kont, mi voi ou mèt d’ot zinstrïman ankor. Le kalbass par ègzanp...

- Sa sé in kalbass delo. Aparaman, le kalbass, li port bonèr. Kalbass-là, moin la ashèt Mayotte. Moin lavé vi in moun zwé là dési, moin la demann ousa li la tir sa. La Rénion na poin sa. Moin la pran inn. Apré, moin la fé in morso, mi zwé kalbass ansanm, mi trouv reprézant bien le godong, le bass li nana dedan, i trap aou li. Mi di arpa lé méyèr in roulèr, soman son fraz po latmosfèr le morso, li sé in bon zinstriman, i kol èk maloya.

Alor, kèl son nou sar antann de Digdig Maloya ?

- Zot va antann morso maloya té là avan moin. Na d’ot lé selon mon soss, avèk le ritm banna navé dann tan lontan, kisoi maloya podiom, maloya kabaré. Apré, moin nana détroi nouvoté, nouvo morso, avèk nouvo zinstriman osi. Dizon ! kèl nouvo zinstriman ! nana kalbass, nana inpé sibal, nana in ti takamba kom Alain Péters téi zwé.

Alor, nana projé dérièr, in CD, in sipriz po demoun ?

- Digdig Maloya nana rienk katr an. Nou lé an préparasion po tousala, mé nou lé ankor dann santié. Soman nou zwé, demoun i pé venir voir anou. Le 30 mé, nou zwé l’Îlot, le 12 juin nou lé o brïlé, les Récréateurs. Apré, biensir, nou zwé po la fèt la mizik, Sinn-Ni si koté Barashoi. I gingn trouv anou. Nou sé Digdig Maloya, nou shatouy maloya.

Antrekoz ansanm Babou B’Jalah