Marmay lékol Léon Dierx Lilèt Furcy é Alphonse Daudet Ti Séré Sin-Lui la aprand koz kréol é ékrir kréol. Sa in lidé la méri Sin-Lui, ke linspèksion akadémik i soutien an parmi lo band dirèktèr é profésèr. Se projé "Sélil kréolité", sé Gaston Hoarau la piloté, li lété an mision pou la méri.

Avril lané pasé, i débit laksion. In lantouraz domoun an parmi François Saint-Omer la parti rankont gramoun Sin-Lui pou ramas in ponyé kont é zistwar avèk in bon pé d’zafèr. « Tou sa na in lien avèk nout kalité réyoné », i èsplik a nou Gaston Hoareau. Li rapèl anou ke lo promié Hoareau la ariv isi lavé in madam malgash é ke le nom Hoareau té ékri avèk in “e”.

Navé in lèspas lékritir kréol é in not kont é zistwar

Dan lé dé lékol, navé in lèspas lékritir kréol ke François Saint-Omer la animé. É dan lé dé kartié, navé in lèspas kont é zistwar ke la animé Isabelle Cillon é Jonathan Sautron. « Nou la ansèrv zistwar "Ti kok"… ansamb liv Alain Armand, François Saint-Omer é dot ankor pou étidé la grafi kréol », i di a nou Gaston Hoareau. Marmay i san a zot a lèz zordi. In profésèr la di a nou sa.

Sam’di i vien’d pasé a lékol Léon Dierx Lilèt Furcy, lé marmay la lir an piblik, an kréol é an fransé sak zot la fé. Navé mèm in spèktak moring. Kom sot la kompri, la lang kréol é la lang fransé i fé bon ménaz. Zordi lé lo tour marmay Alphonse Daudet ti Séré mont a nou zot gayar. "Sélil kréolité" la pèrmèt zanfan Sin-Lui a konèt a sot avèk zot manièr kozé an kréol é an fransé.

"Sélil kréolité", i pèrmèt osi « fé in lamaraz » ansamb komorien, mahoré, malgach, malbar, yab, sinoi… zoréy, avèk tout domoun i viv isi. Gaston Hoareau i souèt lorganizasion in rankont a Sin-Lui avèk tout domoun i étidi la lang kréol.

Laksion la nou va fé revi a li an foto dan nou lédision domin. Nou artrouv.

Jan-Fabris Nativèl