Mon Péi Na In Lam é. La Di Osi, Mon Péi Na In Rèv.
Lo Jour Lo Rèv La Rényion Wa Désine Dovan Mon Zyé.
Ptèt Ma Ashèv Konprann é Myé Aksépté
Lo Rèv La Paléstine, Lo Rèv Lo Monn Antyé. Poukwé ?
Pars Lo Jour Mon Léspri Sra Asé Rouvèr Pou Kalkil Lintansyion Mon Péi.
Li Sra Rouvèr Po Tout Bann Zintansyion, Po Tout Mon Bann Frèr
Li Sra Mon Prop Limyér Pou In Péi i Apél. La Vi
Zordi, Nou Lé Là Pou Inn Bone Koz
É Si Nou Vé Nout Lintansyion i Ariv Ziska Bann na,
Ifo Déza, Nou Lé An Pé, Isi, Ek Nou Minm ! Rant Nou Rényioné, Bann Batar ! Zanfan In Péi !
Si La Pé Té in Péi
Fodré Ni Tonm Son Zanfan
Ni Onor Ali
Ni Fé Viv Ali
Ni Grandi Ek Li
Ni Sobat Pou Li
Ni Réaliz Anou, An Pé
Si La Rényion Té In Péi
Fodré Ni Tonm Son Zanfan
Ni Onor Ali
Ni Fé Viv Ali
Nou Grandi Ek Li
Nou Soubat Pou Li
Nou Réaliz Anou, An La Rényion
Sak Zanfan bann Bondyé La Ékri... La Pou Ét Désiné ! É Sra Inposib Éfasé.
Pou Mwin, Sak Na Pi L’Kor. Lé Toujour An Vi
Sak Na Pi Zorey. i Antan Myé !
Alor, Mi Vé Koz Ek Zot :
« Aou, La Konét La Guér
Ou La Konét In Mové Mizér
Ou La Sobat Po Out Vi
Di Amwin Si Mi Na Le Drwa Ét Ankolér
Di, Si Mi Na Le Drwa Krash Si Mon Joli Mizér
Di, Si Mi Na Le Drwa Éfas Amwin Dovan Bann Dirijan, Komandér ?
Di, Si Mi Na Le Drwa Tonbé, Rét Atér, Pléré, Rod Pou KrévéEk In Vi La Pokor Akonpli ?! »
Anon, Mon Nasyion ! Anon Trouv Nout Vérité Dann Soufrans Nou Lé Pokor Oblijé Pas Anndan
Anon Rod La Limyér, Lo Méyér Pou nou Minm. Mé Pangar...Nou Riskab Péy ForNout Domin, Si
Zordi, La Paléstine i Anserv pa Nou Konm In Motivasyion Pou Nout Byin Ét, pou Nout
Rovandikasyion Dan Nout Pli Gran Péi. La Vi !
Sak Lé Di, i Apartyin Mon Boush.. Ek Mon Lam.
Lo 31 Zanvyé 2009. Fonnkér Pou La Marsh Solidér Paléstine.

Ingrid Varon,
Parkoté l’Ést