Sé pa si lo bann spéktatèr la arkonèt azot, mé la bokou ri lo mardi 8 dernyé dann téat Champ Fleuri pou promyè roprézantasion “Bézman dan la kour Patel.” I fo dir la fé in sos la lang byin gra pou okip lo ka sakinn bann personaz. Sully Rivière et Jean-Pierre Boucher la pa ménaz azot pou bat an kréol la piès Gérard Darier. Zistoir ladi lafé, zistoir vré, zistoir mantèr, i fo tyinbo pou suiv lo mayaz la fés nana dann boutik Matallo. Ant lo bankié, son métrès, son fanm, son sékrétèr, ant la fanm lo dépité mèr, son shoffèr, son mari, nana pou kass la tét. Mé ou giny bien suive. Ou suive toute : lo zirman d’inn, la makrèlri dé-troi, lo vilin manyèr inn é lot... Épisa ou ri bonkèr.

Kisa va giny lot Ti Loulou ?

Konparé sanm “Kaz an kaz”, térlà diré lé sirvitaminé, 14 personaz pou 6 aktèr, i fé bouzé. Na pwin in tan pou asiz, domoun i kour pou évit bal fizi le mo, i ranp atèr pou évit giny son kozman, i kashièt sou la tab pou anpar lo kou... I voi d’zafèr dan so boutik, ziska in dépité-mèr dann in blouz fanm mayé sanm in bankié i rèss arienk lo kilot.
Si na pwin tro klian i vyin fé d’kours malgré lé an solde, na in linz toute la bann i vé. Toute la bann i rod sa pou fé plézir son fanm, ou bien son métrès. Gran traka Matallo : i fo artrouv ali. I ress ryink inn Ti Loulou, toute la bann i vé. Sé pa kisa va ginyé ?
Alé war. Na pwin pou rogrété. Tout bann zaktèr i done paké, na plis k’inn va sirprann aou. Anparmi, Rocaya, an kafrine dofé pli vré k’natir. I fé pèr ziska. Na le rést osi, é na pwin inn pou ratrap lot kisoi Marie-Claire Chane-Fung-Tung an belmèr toboze, Erik Fleuris an tranblad akoz lo bann fanm son pérsonaz, Jean-Pierre Boucher an vandèr dépassé èk Marilyne Janson ki trouv pa in kilot asé gran pou èl. Tanka Sully Rivièr, li réss paréy li-minm kisoi an dépité-mèr, an shofèr, an vandèr konkiran.

Eiffel