Domoun i inm Danyèl Waro, pou son maloya, pou son fonnkèr, son kozman. Lér in diks név i ariv kisa lé pa présé antann ? Fonnkézèr, li amont anou bann téks son rékéy "Démavouz la vi" la pokor larg tout zot santé. Sat la fine lir lo liv, nora d’gou akout "Sof Dofé " sanm " Po mwin Bondyé" sansa "Trwamar". Sat i suiv ali dopi lontan sra anlèr, lérk in morso dann tan "Garfourn" i arpét an l’an démilsis.
Epi sat i suiv bann kabar do lo, sat i anminn 20désanm dann son lantouraz, somanké la fine antann in lèr "Po Ema", sak lo kèr la fané si lo film "Batarsité" va rotrouv son " Po mwin Maloya."...

Kozman maloya

Tousa pou di in diks Danyèl Waro i ariv pa tousèl, i avans ék son vi, "Flo", "Naïlé", i avans ék son péï ék son bondié kabaré. Konm dann kabar, na maloya, na lo kèr, konm dann kabar avan sa, an minm tan k’sa, épi na lo kozman. Kozman roulèr, kozman sati, pikèr, tanbou, kozman toumba, morlon, kozman bob, darbouka, bendir, triyang, karkabas, kozman tarlon ansanm Thierry Abmon, Loran Dalleau, Damien Mandrin, Sami Pageaux Waro, Harry Périgone ék Philéas Vincent.

Pou avans ansanm

Epi kozman la voi Danyèl Waro, klèr, i ral anou anlèr, i raminn anou dann sièl La Rénion, ousa sakinn in grin. Kozman Danyèl Waro i liane dopi la kaz bann zarboutan kréol, i gatir sanm nout listoir, i pét an flèr dann koméla, pou koméla, pou domin.
Bann téks, bann romans lé fané dan lo tan, konm pou mont anou zistorézon la pa lo tan lé kap sanz nout natir, nout santiman, nout manir... La poin rien lé kap fé débouz son krié, son ploré, son mazinasion, son santiman si la vi.

Zistorézon, Danyèl Waro, zordi ankor i fo soubat ?

Malérézman oui... Lo sanzman lé partou, kinm moin la fine bouzé, kinm moin la fine nir responsab tousala... In monn dann trou i rés dann trou, sat i réisi - soidizan - li suiv le modèl minm. Le problinm lé bien ék modèl-la. Lézot lé touzour atèr, touzour andsou. In morso konm "Trwamar" i rés vré pou koméla.

La vi, l’amour bien sir, di amoin, maloya i sort dann servis kabaré, pou ou li lé ankor sakré ?

Po moin na ankor in koté sakré. I fo li nana in koté sakré, in linportans plis k’in lamizman, plis k’in kadans, plis k’in ritmik, in folklor, po moin sé lo santé, la voi, lo santiman... Maloya lé konmsa, an sakré, an respé zisko bout, ténir lo tan, l’éspas, rés solide pou pass l’éternité la. Pa konm in biznès. Maloya i aport aou la fors, lé konm in rolizion. Li koz ék problinm domoun dann minm tan li travers le tan, l’éspas, li koz pou La Rénion é pou lo Monn.

"Grin n’syèl" sé kodinn ?

Souvan mi di mon kodinn an zékli d’syèl, sinonsa l’amour pitaklé. Epi, si ou pran lo promié morso "Po Ema ", ousa mi koz si lo andikap, si 20 désanm, pou di nou dovré lév doubt olié rés dann fotéy roulan... Ema, kan moin té pti nou té ravaz aèl. Mi doi aèl plis k’inn sanson. Amoin osi té aval amoin lo gri. Moin la pran tit la, pou di nou lé zoli, nou lé gayar, na poin avoir ont.

Ou pous pli loin dann ron batarsité minm ?

Batarsité in mo i déranz, mon kodinn an grin n’sièl, i raminn anou anou minm, pou ét in vré réyoné. Li tonm zoli, mi mét ali an avan. Sé in armonizasion d’moin minm.

Francky Lauret