Lidé konkour-là la énèt an dé mil kat, lané son promié lédision. Lékrivèr Daniel Honoré, té i mét ansanm ék l’UDIR (Union pour la Défense de l’Identité Réunionnaise), la propoz Roger Ramchetty, prézidan CCEE (Conseil de la Culture, de l’éducation et de l’Environnement) épi LR-FOL (Ligue Réunion-Fédération des Oeuvres Laiques), mét an plass in konkour nouvèl an kréol pou fé viv lékri la lang, pou donn osi bann marmay lékol innot kalité téks pou étidié.

« I fo pa nou négliz nout promié lang »

Sito, CCEE la tonm dakor é la propoz in lèd lozistik, pou Roger Ramchetty, « nous sommes convaincus que la seule façon de perpétuer une culture est d’avoir des gens qui produisent, qui créent. » É domoune i kré, i ékri zistoir an kréol rényoné nana, soman i fo alé rod azot, tash manièr zot i kasièt pi, i fé konét kosa zot i fé.
Daniel Honoré la éksplik anou lo promié lédision la bien tourné, la pérmèt dékouv nouvo lotèr ék téks gabié. An dé mil sink, la marsh in ti pe moin, soman lané pasé la arpét an flèr. Lavé kinz partisipan la prézant vintéinn nouvèl. La kalité té là. Anpliskesa sat la giny promié pri, Nicolas-Louis Séry ék in nouvèl i apèl “Inn vi pou énèt”, sé pou Daniel Honoré lo méyèr lékrivèr an kréol son zénérasion. Se lotèr-là sé in désinatèr pou lo batiman. Li té i èm lékritir an kréol, té i fé bann téks shanson an kréol, sinonsa de-troi fonnkèr soman kant li té i ésèy ékri inn afèr pli long li té pa kontan d’li. Sofkoman, li la pa largé, li la kontinié son travay lékritir é bann ziri lo konkour la trouv son zistoir té vréman bien fé.
Parlfèt, « konkour-là i pérmèt osi révèl bann talan ». Zordi, LanKréol la trouv son plass, li trass son rout. Pou Daniel Honoré i fo dir, « lé rar in konkour an kréol komsa, ziskalèr navé poin. Ni konstat nana La Rényon in piblik nouvo pou lo kréol, bann skolèr sinon liniversitèr navé poin avan. I ve dir i fo nana téks nouvo i sort an kréol. I fo pa nou négliz nout promié lang. » Zistorézon, i fo d’zouti pou transmèt lékritir kréol é pou fé viv inn litératir lé ankor tann. Dopi la lang kréol la rant dann lékol, bann profésèr sinon zélèv lé paré pou dékouv bann nouvo lékrivèr.
Alors si zot na sèz an é pliskesa, si zot na téks parkoté la zamé té piblié i pe fé ansanm inn ti nouvèl kinz paz o plis, si zot la zamé tonm loréa lo konkour, trap out stilo, fé shof poinyé, lo tèm lé lib kom lo grafi (soman ou shoisi inn ou shanz pi apré), léss out limazinasion alé. Riskap out nouvèl i sa giny lo promié pri : inn piblikasion ék son promosion.

Estéfani

Pou trap lo dosié linskripsion zot i pe alé la LR-FOL (3 bis rue Rontaunay, Saint-Denis, 0262.94.84.40), sinon CCEE (34 rue Sainte-Marie, 0262.41.44.12). Ézit pa pran kontak ék zot pou giny ransenman. Zot nana zisko 31 zuilè pou anvoy ali.