Zistoir-la i éspass dann tan lontan, dann in tan, demoun i prétan, bondyé l’avé pankor mont dann syèl. Mi pans, li té apré vizite son kréasyon, épi son bann kréatir, pou oir si tout té i roul ron, si sak li la fé lété valab, sansa lété pa.
La pa par movèz volonté, mé souvan-défoi, ou i vé fèr in n’afèr byin, mé i marsh pa : lé pa byin konm ou i vé : sa lé vré pou d’moun, akoz pa pou bondyé, mèm si i prétan, si konm mi kroi, li lé parfé.
Mé konm nou, nou lé pa parfé, lé difisil fé in n’afèr sink-sink pou nou. Ala sak mi mazine kan mi kalkil nout manyèr aprésyé la kréasyon bondyé. Mé mi ankouraz pa pèrsone fé konm moin, pars sa i fé mal la tète, épi mi kroi ossi, sa ansèrv de riyin, sa i kont pou la po patate !

Kriké ! Kraké ! Kriké madam ! Kraké méssyé ! Laramé manèv Bondyé !

Donk bondyé la désid fé son tour di mond. Pou akonpagn ali, li la trouv in dalon, dann in gafourn pèrdi : moun-la té i apèl Laramé. Sa in nom rar sa ! Ousa k’sa i sort ? Mi kass pa la tèt la-dsi, li apèl Laramé é lé byin konmsa ! Li apèl Laramé, in poin sé tou !...
Moin la di li ansèrv daln bondyé, mé i vo myé mi di : li ansèrv manèv pou bondyé : li done in kou d’min si la bézoin, li lé la.
Ni pé dir galman, li sé lo marsh-avèk bondyé ! Li sava, li vyin, li done la min, li trap in n’afèr si la bézoin. Kan la plui i tonm, avèk in goni, li prépar in saou, in sort kapishon pou anpar in pé la plui. Si i fé sho, li sar rode de lo.
Dizon, li fé tout sak in marsh-avèk i fé... Mé lo pli prinsipal sé bondyé k’i fé, sé li k’i fé mirak pars Laramé, déssi la kèstyonn mirak, li vyin pa bou fé gran-shoz, mèm li pé pa fé aryin.

Kriké, kraké ! Bondyé la fé troi mirak !..

Lé dé konpèr i ariv dann in vilaz. In bann demoun lé dan z’ot karo lo blé ; zot la fine koupé mé zot la pankor ramassé. Lèr-la, dann syèl, nana in bann gro niyaz noir. Oté Baba, la plui i sava tonbé é banna la pèr i gaspiy z’ot rékolt.
Kissa va ède azot ? Koman va fé po k’zot rékolt i gate pa ? Bondyé i di : li nana in solisyon. Banna i domann ali kossa i fo pou li fé son tik-tak é bondyé i di li la bézoin solman in tizon byin rouz, konm kan li sort dann fé.
Bann moun lé in pé méfyan, mé zot i déside fé konfyans. Pars zot lé konm sa, épi bondyé i donn konfyans.
In n’ instan, lo karo l’blé la fine brilé.
Oté Baya ! In pé pliss l’afèr i tourn o vinèg, pars le bann moun té i kalkil pa in n’afèr konmsa té i sar arivé.
In pé plis, in batay koud sab té riskab pété. Mé bondyé, i di lo bann moun, inkyète pa, alé dann z’ot far-far, zot va oir koman lo blé lé byin anndan é anplis ké sa, byin ranzé oté !
Afors, zot lé kontan, in n’instan, i fé in fète pou lé z’invité : manzé an kantité, la boisson an sifizans. Apré an avoir byin manzé, byin boir, la sosyété i sépar : shakinn i sava son koté.
Bondyé i di Laramé : « Ou i oi sak moin la fé ? Aou, fé pa zamé in n’afèr konmsa pars malèr lé riskab arivé ! ».
Laramé i di oui, mé ki vivra véra !

Promyé mirak lé fini, ni tard pa oir lo dézyèm, la somènn proshène.

(In zistoir Georges Gauvin la ramassé)