Kabar dann kér Chaudron : Zorkri Maloya an promié sanm lo gayar santé in Julien tout domoun va antann parl in zour, épisa Danyèl Waro sanm son bann zouar pou kraz dann somin blaké, si in parking garazis.
Si ni akout Laurent Dalleau, inn bann zouar, oir domoun koma sou la pli, dann la limièr in révérbèr, ék la pli i fane, tousale... I fé romazine ali kan li la part’ zoué sanm Danyèl dann péï Cuba. Bann ga la kour, reggae roots, noré di : na in natural mystic dan lé zér. Lé vré.
Fami, zénzan, zénfi, kamarad, tout la bann anparmi i shant sanm Danyèl. Kisa la di la zénès i koné pa maloya ? Ala in fanm i ranplas Waro si roulèr. Ala Julien i larg in santé pou fé pét lo kabar an flèr. Epi sourir Danyèl... Komsa minm li konpran kabar, atèr, ansanm.

Francky Lauret