Flash pa tro marmay ! Na pa ninport kisa i pé tir portré. Serviss kabaré, la pa folklor, la pa in sirk po touris. Ala in pé, sirman an vakanss La Rénion, i vien tir foto, komsi zot i lé dann marshé Sinpièr. Arèt in pé mounoir ! Déza, par respé, akoz zot i demann pa la pèrmision. Lespozision kolonial la fini. Mi di sa, soman, amoin mèm, mi demann akoz mi pran foto. Sèt foi, mi poz in kou, mon aparèy foto atèr, po rant dan le ron sakré. Tir savat, tir soulié, bord tout sat i resanm la modèrnité, po respir lansan i apèl zanar. Zot i vé zimaz. Ogard koman i tourn in kabar maloya, soman le moman sakré i pran pa an foto. Kit ali ou li lé. Alé voir par zot mèm. Tir pa foto. Antann. Konprann. Danss si ou vé. Shant si ou pé. I fo bien konprann nout zistoir la pa in marshé, in zobzé po la brokant. Bien alor, koman n’a fé po prézèrv ali ? Koman n’a fé po amont nout bann zanfan ? Selon moin, i fo respèk dabor la volonté la fami.

In tradision po tout rénioné

Nou sa pa rant dann gran lesplikasion. Serviss kabaré, sa in lomaz po zansèt, in gran fason tienbo nout rasine malgash. Là, sirman granmoun Baba i voi la tradision la pa mor. Nana ankor bonpé i okip po fé avanss ali, malgré nout péi i vé profit la modèrnité. La tradision la pa mor. La zénès lé là, i done la min, i vèy koman i déroul, i aprann. Na sat i vé ofisié. Na sat i vèy an respé. Serviss kabaré, mi pé pa dir mi koné. Tardra viendra, nou sar ékri an gran paz èk Zan-Klod Vyadèr, in potomitan, in zarlor, i koné koman i déroul in serviss kabaré. Kansa i komanss in serviss ? Akoz i fé sakrifiss ? Pokosa i fé Serviss ? Po souvnir nout bann zansèt, oubiensa po tass manièr pa oublié nout zistoir ? Oté, inn fami i pé nioré son bann zansèt, é li pé pa mèt si koté zistoir son bann zansèt. Zistoir-là son zistoir. Sa i vé dir, Serviss kabaré Baba i konsèrn rienk bann Baba ? Oté, non. Sa i okip tout la bann. Sa i konsèrn tout La Rénion. Sa sé nout zistoir. Parlfèt, blan, noir, jone, tout rénioné lé là. Serviss kabaré sa in tradision po tout rénioné !

 Bbj