Dan’d in mélodi ou chant “Li vé viv la o…”, kosa ou vé dir par la ?


- Tou kon fé sé in morso i rotras in pé lo parkour in dé ti boug otour moin. Antrot mon papa par èksamp ke la grandi o Chodron, li la toujour viv la. É a pèn, li la gin in ti moiyin, ou voi kosa mi vé di a ou, li la rod in ti kaz dan lé o pou sort dan béton. O tour d’moin, na pa mal d’ti gramoun lé kom sa.
Pé tèt a moin osi in jour, ma lé dan lé o.
Tou lé ouikènd, moin lé dan lé o ansamb mon papa èk mon momon. Moin na in piyé dan se mod de vi la. Nou lé antouré zanimo, nou manj kari fé d’boi… Moin na lokasyon viv sa, mi ésye viv a li in maksimom. Ou koné, kan ou la grandi dan’d béton, dan’d blok, ou fé pa tro kuyi manjé fé d’boi, na poin tou sa la. Kan ou na in kour pou joué dan, in fami otour, lé pa kom ou lé dan limèb, individualis.

“Pin pon pin pon”, “Isabèl té bèl de loin, mé loin d’ètre bèl”

Koman ou la rankont la muzik ?


- Tou kont fé, moin la komans la musik dan lé zané katro-vin kinz par la. Ansamb Ranlo é in’d kinzèn chanteur Chodron, moin la krée mon promyé group : CEDC ou Canyar éduké dan la Cour. La mi dékouv la musik o final, lété trè hip hop é déjà navé d’musisyin. Nout morso té roflèt byin nout léta dèspri d’lépok “Pin pon pin pon”, “Isabèl té bèl de loin, mé loin d’ètre bèl”. Nou té antrèn just tèr la mèm an plus (dan in lokal Vilaj Jeune) avèk in ti post radyo o dépar. Aprè, chakèn la fé son chomin, na sak la rèst dan le milyé la musik é na dot la fé ot choz. Na lé ga la parti dan’d téat. É dan’d sak la Kour (le Téat), navé in ga té rap sanb nou : Laurent Boisedu ou Tchèk. Pou sèrtin, nou la pèrt de vu é pou dot, nou ésye gard le kontak o maksimom.

La musik, kosa i aport a ou ?


- I fé voyaj a moin in pé, i fé dékouv a moin dot lorizon. Lé kom in trin partaj, mi kotoye in bon pé musisyin, dot stil musik, dot ga, dot condisyon d’vi. Sé in léchanj o final ki fé dékouv a nou in méyèr viv ansamb.

Out janr musikal, kosa i lé ?


- Mon musik (é rir) ! O dépar moin lété hip hop, aprè raga, par la suit régué dèns-ol. Mi èm biyin Maloya osi. Moin na poin d’stil, mi èm la musik. Moin lé ouvèr dèspri a se nivo la. Mi ésye fé pass diféran mésaj. Moin lé pa la pou fé chanj domoun. Mi mèn mon konsta, mi voi dé troi trin koman i lé, mi done moin poin d’vu. … Mi voi, mi ésèye dénons in nafèr. A dé foi, i pé dénons a koté osi. Si na dé troi ti ga i pèrmèt a zot réfléchi in pé, i sora toujour d’sa gagné. Moin lé pa in profèt, mi vé pa èt tou sa la, moin lé la zis. Kom mi di a ou, mi voi moin kom in janr loparlèr, in laparèye foto…

« La vi sa in nafèr bizar, i pé frap koté ou, i pé frap si out port »

Out mélodi “Réspèk”, kosa i rakont ?


- Dopi tan’d ti, mi voi otour moin ban’d boug i tap zot fam, voizin, voizine. Kan ou rouv journal ou voi tou sa. Na poin tro lontan i komans fé in ka èk sa. In fanm la ging in kou sab par la ba, in ta kafouyaj kom sa. Ou koné si ou la grandi La Rénion, dan in mond La Réunion, i fo ou la fini kotoye so trin la kèl ke par. Pou dir a ou vré, moin na in kopine la ariv in trin kom sa avèk in boug. É moi la fé lo morso avan la ariv a li sa. Du kou, la vi sa in nafèr bizar, i pé frap koté ou, i pé frap si out port.

I antan pa ou tro an’s moman ou prépar in nafèr ?


- Moin lé parèy tang, kan i ariv la sézon, mi antèr (é rir). Mi boss pa mal pou dot zartist, a droit a goch, du kou le cordonyé lé toujour mal chosé. Na’d zafèr i prépar dan lèr : in lalbom liv ke lé prèsk fini é in lalbom studyo. Ou koné tou sé in kèstyon darjan, nou voil ar pan ou la fas. I fo ou ginye réuni lé fon pou près sa. Nou lé optimis, na voir si bon diyé i done la fors pou ariv zisko bou.

O fèt, kisa i lé James ?


- In gar la kour ! Moin mi voi sa kom, in gar kom tout domoun. Moin na mon madam, marmaye, papa, momon, mon ti vi famye normal.

« La famye, sé mon tout »

Ou koz momon, papa, madam, zanfan, kosa i lé la famye po ou ?


- Sé mon tout, mi vé di a ou ! Pou moin san la famye lé difisil. Moin na la chans avoir ankor mon papa èk mon momon. Moin na mon madam, moin na la chans osi avoir mon band marmaye. Mon madam èk mon momom i soutien a moin dan sak mi fé. Mon viyé i vé pa mont so koté santimantal, mé o fon mèm, mi koné ko sa li rosan.

Dan’d chodron na’d talan é James lé in dantre zot ! Avèk dot dalon pa ryink la muzik zot lé an trin trasé in chomin pou la générasyon i ariv. É la osi nad surpriz.

Tèks é foto Jan-Fabris Nativèl 

Concert