Culture et identité

Sudel Fuma, un héros créole i ranplass pa

In ékri Georges Gauvin

Georges Gauvin / 20 mars 2021

Mézami, la shans la voulu k’inn dalone la anvoye pou mwin in fime i parl Sudel Fuma, in fime William Cally, avèk konm titr : « Sudel fuma, in héros créole ». Mwin l’avé fine oir fime-la na poin lontan, mé konm lété dsi mon lordinatèr, mwin la rogarde ali ankor in kou, ankor dë kou - fransh vérité fime-la i pran aou par lé tripe.

JPEG - 46.2 ko

Pa solman pars li rakonte bien listoir laksidan la amenn Sudèl l’ot oté la vi konm li lé zordi, mé pars i anparl galman in ome épi son passyon, koman son kèr lété amaré avèk la tèr La Rényon - nout tèr La Rényon é sirtou koman li lété angagé pou tire nout listoir dann fénoir é sirtou tir listoir bann zésklav épi bann zangajé dann lo néan lo kolonyalism l’avé mète ali.

Sudel in éro é sa lé vré toulbon : in zanfan la kour pa tèlman préparé pou vnir sak li la devnu, mé li l’avé ossi lé zarm pou fé sak li la fé.. Dann tan-la listoir La Rényon lété kamouflé é bann zom politik kolonyalist té i fé toute pou anshèv antèr nout listoir.. Si mi di azot dann tan mon zénèss, l’avé in kantité d’moun téi koné pa l’avé in zour zésklav La shé nou. Zésklav, maron, zangazé, sa lété in n’afèr la konéssans ofisyèl téi rokoné pa.

In pé téi di i fo pa fé in konte avèk sa, pars lésklavaz té pa dir, li té dou dann noute péi, pars d’ote téi di bann partizan lindépandans-Paul Vergès, mèm si li té i parl solman lotonomi - va profite de sa pou détash La Rényon avèk La frans. in pé, mi pans konète kissa i lé, téi di, i fo fonss dann la roshèrch listoir noute pèp.

Sudel l’avé toute sak i fo pou fé in éro : gran sportif é gran konpétitèr, karatéka, om politik, proféssér, shèrchèr anrasiné dann la vi nout pèp, gran voiyajèr a la roshèrch landroi noute zansète téi sorte : listoir la révolte Sin-Lé in kékshoz tré inportan pou li, bann zanfan La Creuse sa ossi lé dramatik é inportan, toute noute bann zorijine avèk moniman dann toute péi bann rényoné i sorte.. épi sa fin avèk in kamarade ali, l’ote la nyabou sov son kor. dann in loséan indien démonté avèk bann vag sink-sis étaz otèr, an ranpar d’lo, é zot ladan.

Kan mwin la rogarde lo fime mwin la di lé domaz boug-la lé mor tro bonèr, pars li l’avé l’avé ankor dé shoz pou fé dékouvèr anou… Domaz mé Sudel lé pa ranplasab é mi koné pa o nom de koi, o nom de ki, in moun i sorte déor i pé ranplass ali issi linivèrsité. Kèl kalité lorgèye ! Kèl kalité prétansyon ! kèl kalité vanité ! in pé i pé avoir pou sèye ranplass ali.. Ranplssa noute éro kréol shé nou ! La pon konsyans do, lapoin réspé don ! i ranplass pa in éro kréol La rényon-fransh vérité.