Li ésplik son travay, son rosèrs dan la vi, son sansasion zartiss, soman li nior pa son pasé, son lésklavaz. « Moin la réaliz ouvraz là sirtou pou mon bann zansèt afrikin, sak lani isi dann lil la rényon dann tan lésklavaz, ké la fini par èt aboli lo 20 désanm 1848 », i di anou Augustin. E li kontini : « lé osi po sak lé ankor laba dann lafrik, dann ninport kèl rézion. Moin lé in zénérasion i sort dann in pèp noir, mi konbat si la tèr dann léritaz sak la lèss po moin ». Son linspirasion i sort parkoté Lafrik, é li nior pa son rasine kiltirèl. Mèt aou maloya, li di fonnkèr, son mazinasion, son raz dawar. Angazé, li mèt ansanm po i arkonèt listoir Elie, bann zésklav la révolté laba dann kartié Laleu. Parlfèt, sé dann manifestasion po Elie, Komité Elie la roganizé, moin la trouv ali èk son liv. Lir zot va voir, son parol lé sinp, mé i sar loin...

Bbj

Kiltir dézakordé

Li dobout koté la mèr
Kèl koté i trouv péi nasion
Niaz noir dann sièl blé
I flot dési landroi Lafrik
E dési la tèr lo péi
I viv èk son kiltir
Dann tout lèr sérémoni
I invok la misik spiritièl
Partou dann lo mond
Lé pa lo minm kiltir
Mé isi lil la rényon
Nou lé tro divizé
Parfoi minm dann fami
Na bonpé lé an dézakor
I suiv pa lo minm rasine
E i rès touzour abazourdi
Pa bozwin esplik ali
Zot i profèr minm rant la zol
Olèrk nou viv an pé
Dési la tèr bon dié
Partou dann lo mond
Lé pa lo minm kiltir
Mé isi lil la Rényon
Nou lé tro divizé

Augustin Tirano, extrait de “Voyaz l’am”