Papang èk lo shat

Lavé in foi, mésyé lo foi, la manz son foi, èk in grinn sèl ! Dann tan-la, zanimo lavé la parol...
In bèl papang, lo bèk byin rokourbé, gran-gran grif déssi son pat, lavé trap in tang la fré. Zot i koné kosa i lé ? Solon moin, sa lo non i done bann tang kan i sort sou la tèr apré an avoir kas son somèy in bon koup de tan.
Mank de po pou li, zis kan li sort dann son trou, papang té i pas par-la… Pa tèlman par-la, mé dopi an o dann syèl, zoizo rapas-la la vi ali, li té apré rode in kèkshoz pou ranpli son bouzaron, pars son vant té i kriy-kriy in pé dépi lo matin.

Kriké mésyé ! Kraké madanm !

Oté ! zoizo-la la fons an piké, konm in laviyon, déssi lo tang pankor byin révéyé, la kap ali dann son grif épi la parti poz dési in pyé tan-rouz, an atandan, li fé lo tang in mové déstin : son gouté, — dann tan-la zanimo té i goute ! — ou byin son manzé onzèr, sansa son katrèr... Li lé pa tro présé : dann tan-la, bann zanimo té i viv byin, san présé, koul. Manzé té i mank pa ! Dolo lavé osi, épi in lo byin klèr, byin pir, in lo an dous ivrès. Mé in voras i rès in voras, in krévèr i rès in krévèr, in goulipya, sa i shanj pa ! Épi, manzé, sa i fé pa kado d’moun ;

Koton mayi i koul ! Rosh i flote !

Lo shapo :

Lo shat l’apré bate son karé, partou-partou, an fou-fou, san traka, la vi té koul mon fra ! Koméla, ou i pé tonm déssi in mal fondé ; lé riskab bate out mayi avèk in boi, sansa fou aou in kou d’galé dann out non-di-pèr, mé lontan té pa konm sa ! Lo shat i pas sou in pié d’boi é li san konm in lodèr la vyann frèsh i ral ali, i shatouy son mizo, i fé koul son bav : Li kal nèt... li gard anlèr é li oi mésié papang — pétète osi madam, mi koné pa byin o zis ! — èk lo tang la fré dann son bèk.
Li di dann son kèr : « Moin la anvi manz tang-la, mé… koman i fé pou alé vol sa avèk papang ? Lé riskab rash mon zyé èk son bèl bèk ».

Lo Zistoir éstèr :

Kriké mésyé ! Kraké madam !

Kan ou la poin la fors, ou i manyé la riz. Alor, li mète a flate lo papang. Li di si, li di la, li di l’ot nana zoli kostime, lé byin gra, la byin profité. I prétan galman papang i koné byin kozé, fé gayar diskour, mèm shant romans. Ala li domann papang pou shant in pé pou li. Lo zoizo i réponn pa : aryink son zyé i fé va’t’i vyin, pou oir si na poin zènmi. Ala lo shat i flate, i flate, mé papang la fine kalkil ali, é in momandoné, li trap lo tang, li mète sou son kèl kèl, sa son d’sou d’bra ! épi li koz èk la shat. Ala kosa li di : « Aou lo shat, ou i pran amoin pou in kouyon ou la ? Ou i rod fé rouv amoin la bèk pou fé tonm mon proi ! Bin mounoir, ou nora la pène alé la shas par ou mèm. Foutor ! Ou i pran amoin pou in korbo ? Ou i oi pa moin la pa in zoizo zorèy ! ».

Lo shat, la ké rant so pate, la parti kashyèt, é papang la manz son tang an vitès... Konm koi, dé foi, dann zistoir, lé shoz i éspas pa konm dann bann fab Lafontaine.

Kriké ! kraké ! koton mayi i koul, rosh i flote !
Lavé in foi, méssyé lo foi, la manz son foi èk in grinn sèl.

(In zistoir Georges Gauvin la ramasé)