Fonnkèr pou Dédé

Dédé, mon Dalon, Mon frèr militan,
kel dépitasyon, kel maladie la mènn aou dan péi la mor ?
Doulèr lo kor ? doulèr lespri ? Ki koné ?
Fatigué espéré in soley levan si nou péï
Fatigué résisté kont Konba d-kok
Ou la di si fo lévé donn pou levé
Ou la trouv sat la lèv dobout
Sat la lèv pou li tousèl
Sat la lèv kont ou
Sat la lèv pou son bann
Sat la lèv kont out bann
Ou la trouv in péï saviré 4 koté
Kel traktèr pou rotras nout somin la limier
Kel grue pou fé lèv nout konsians
Pou rodrès nout linité
saviré dan la divizion
sakinn dan son tournéviré
pou rod in plas kalaz
pou réform nout revolisyon
Dann biro kapitoné
bann asistèr lé an takon
pou gard nout peï kapoté.
Okilé lo tan nout tout ansanm
Té sant
Si pou levé, donn pou levé
Pou détak la lang
Pou nout droi kozé
Pou la tèr pou ti planter
Pour Adekalom pey pa
Pou kréol partou, toultan
Pou tir nout listoir dann fénoir
Tout se bann konba
Nou la mené ansanm, ansanm
Ek ou Dédé
min dan la min,
an fierté in pèp maronèr
in fanal dan nout minm
Maloya la pa nou la fé
Gramoun lontan la fé Maloya !
Oui mé gramoun koméla i krèv dan la dépitasyon
Persone i voi pa
Zarboutan nout peï
Anou minm i bat atèr
Dan la min linstitusyon
kolé derièr in vit
kisa la dévir nout somin
pou fé tonm anou dan la béance
konbien militan
fatigué espéré la rant dan lérans
mi kisa la pou rod tinn nout fanal ?
si pou levé donn va levé
se kou si nout tout ansanm
mèt nout lorgueil si koté
Agard nout Lamour byen anfas
nout révolusyon si nou minm va fé.
Dan la kour nout nasyon, in pèp i domann pou levé !

 Ghislaine Bessière