Kan i di aou Loran zordi, 20 an apré li la parti, kosa ou mazine ?

- Mi mazine in marmay mon laz, déjà. Nou lété dan mèm shemin. Noré pï èt amoin mi té fini alé. Amoin, Loran sé in kombatan ansanm. Dopi nou la komansé, antank jèn, antank zanfan parti kominiss, zanfan de konba, de Rézistans, de rebélion. Loran la fé an plis sa prézans politik, antank élï, antank militan in pé partou.
Moin, sak mi retien, sé in jenès i batay, in pé plis ke zordi... Mi trouv.
Zordi, pétèt lé tro fasil... Nou, kan nou lété pti, navé in mïr an fas. Zordi, na poin in mïr vréman ; sé in espès zafèr na plin le droi, plin léspas, mé bann jèn i koné pa koman okip ali vréman, i koné pa koman prann zot plas.
Somanké, pou bann jèn, lé plï dir koméla, avan, lété plis nèt.

Pou moin, Loran sé in lékzamp pou reprézant in konba, in fors, in rèv, in lanvi, in moun debout. Sé sa Loran pou moin. In moun i larg pa le kor. Ou ginye mèt out konfians é an mèm tan li di aou shakin i avans in bout.
Shakin i avans in bout dessi in modèl, in shemin, in batay. Pou moin, Loran sé sa.

Danyèl Waro