Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Culture > Hommage

Fonnkér pou Sudèl

mèrkrodi 16 zwiyé 2014

Napwin tro lontan ankor Sudèl ou lavé di anou, anou out bann frér-sér Rasine Kaf, koman ou té i yinm kozman an fonnkér pou rakont la natir, lamour, la vi épi osi pou rakont Listwar nout péyi. Ou lavé di anou sa èk out gran sourir, in sourir ranpli bonér.

Alors, kinm ou la fine ariv l’ot bordaz la vi, nou èmré ou akout, ou antann, lo kozman fonnkér out bann dalon Rasine Kaf la mazine po ou :

Nou na anvi roprann parol in fonnkézér « Ah, si lété pa ou Sudèl
Kèl koulér Listwar nout péyi noré ? » Ou la armont dan lo tan po trouv la sèv la vérité, Pou di non ou vé pa In Listwar bayoné Toultan dann in minm vizion I rakont la fors, la grandér bann dominér. In sèl vizion nout Listwar Dan tout bann liv, Dan tout bann ti shemin, Konm dan tout gran shemin bann vil Larényon. In Listwar kapayé La rant an fors dan nout tèt, dan nout mémwar Pou tié nout dinité, nout domounité. In Listwar mantér I rod pou fé oubli anou nout « Kisanoulé » In Listwar napwin la ont Zordi ankor i vé fé kroir anou Léklavaz té pa sitantèlman mové Akoz la fé dévlop lékonomi nout péyi ! Mésoman, mésoman i oubli rokonèt Kisa pou vréman la travay, Kisa pou vréman la done zot san, La pérd zot vi pou in swadizan rishès péyi-la ! In Listwar insolan I oz apèl « seconde providence » Sat la anshéné, Sat la shabouké ziska la mor, Sat la rofiz la domounité Sépa konbien zètr-imin zis akoz la koulér zot po.
Koman kroir in vré Bondié Soré minm koté sat lé pli for !

Ou la pa gingn suiv shemin-la Sudèl ! Ou la mèt tout out kér, tout out lintélizans Pou rod lo vré Listwar nout péyi. Epi ou la partaz sanm nou tout bann savane konésans-la ! Afors-afors in nouvèl vizion la fénésans Pou fé konprann anou in gran lidé : In mémwar oublié lé plis pir In mémwar ogranzour ! Oui, nou Rènyoné nou lé parèy tout bann zètr-imin : Nout shér, nout léspri, nout mémwar Lé ranpli, i rézone èk tout kalité souvnans Minm sat i armont lwin-lwin dann in vié tan, Sirtou souvnans se tan lanfér, Tèl in boubou an misouk finfon nout shér, Lé riskab in zour ou l’ot i sort, I koul an lav volkan , An lav dofé, an lav la kolér.
Oui, pou saminm Sudèl Lé inportan nou koné, Lé inportan nou konpran Ousa i sort soufrans san nom-la ; Sansa nora pwin soulazman.
Nou pé tap nout koko tanpir nou vé Dosi galé bordmér !
Napwin d’ot maniér Si nou vé gingn viv an frér Dosi se ti morso la tér Nout péyi Larényon.

nou di : nou maladé,
Eya ! Zordi èk in gran tristès Si la pa Sudèl nou maladé, ah
Oui nou maladé !
Mésoman, kanminm sa, nou va kontinié suiv santié la réfléksion li la trasé pou in méyér
domin nout péyi.

Association Rasine Kaf


Inn modékri, inn ti lavi, inn komantèr ?

signaler contenu


Facebook Twitter Linkedin Google plus