Kan mwin la pran lo rolé pou "Oté" dann zoinal témoignages, Lulu téi di amwin parfoi, « Oté »sé lo dézyèm léditorial dann nout zoinal é mi dmandé dann mon kèr pandan in bon koup de tan :kossa mi vien fèr ladan ? An kossa mwin lé kalifyé pou défann la lign éditorial zoinal Témoignages. ? Lé vré dopi lo tan mwin la gingn déshif in pé bann tèks mwin la lir nout zoinal, mé la pa pou sa mwin lé kaliftyé pou fé in dézyèm léditorial épi mwin la di sirman sa in sinp parantèz dann la kominikasyon avèk justin épi lé shoz va roprann zot kours. Dopi sa lo tan la passé, in bonpé d’tan, mi tienbo la bar mi larg pa. Mi pans touzour mwin la pa lo pli kanifyé pou fé sak mi fé mé an atandan....

Mi pans pétète Brigitte ossi kan Paul Vergès la domann aèl pou vnir tavaye avèk li, èl la du domann dann son kèr : Akoz mwin ?Akoz pa in n’ot ? Pou prann in post konba konmsa. Pars travaye avèk Paul Vergès lété amenn in konba san fin, zour apré zour,ané apré ané, prann lo kou é la plipar d’tan lo kou tordu, lo kou an trètr, prann lo kou épi donné, pran lo kou épi donné, rézisté,toussa pou partisip la lite dann kan lo pèp an défavèr issi La Rényon, bann léssé pou kont .Kan ou lété dan la lite avèk Paul Vergès wi vé, wi vé pa, ou téi port in zétikète souvan infaman pou in bonpé d’moun issi La Rényon, in konba ou téi panss sa lété just, mé in bonpé téi oi pa lé shoz konmsa.

Mi koné pa koman Brigitte té i viv sa, mé mi panss téi doi pa z’ète si fasil . Avèk bann kou tordu nout kamarad Paul téi mank pa d’gagné...An pliss èl lété la konjointe Jean Yves Langenier mèr lo Por plizyèr zané é li oss li té okip in post difisil é Brigite lété a son koté.Mi panss Kouraz la pa mank aou, Brigitte, intéléktuèl briyan zoli madam,madam kouraj...Kan mi fé sinploman in pti rotour an aryèr dsi l’aktualité La Rényon, épi dsi l’aktyalité la komine Lo por mi domann kèl kantité kouraz téi falé avoir pou amenn inn vi konmsa... Lé vré èl lété galman dann lo group Témoignages chrétien, é sanm pou mwin so bann moun pur,idéalist, lété zot ossi dann tourbiyon la lite dan in tan ni rapèl la vi lété lété bien difisil pou bann kominis épi toutt sak lété alyansé avèk zot, la min dan la min

Brigitte dann lo konba kont la maladi sé sète-la la fini par gagné. ,Nout toutt in zour nou va afront in l’ènmi pli for ké nou, é nout toutt va pèrd konba-la pa zordi pa domin mé pou nout tout lo zour v’arivé . si zour-la ni pé dir, nou lété dann kan bann just, si zour-la ni pé dir nou lété dann kan lo pèp rényoné nou nora poin pou roujir. Jean Yves mi souète aou kouraz épi kondoléans, kouraz é kondoléans pou zot fiy , kouraz galman pou bann zami épi bann kamarad zordi mi koné zot lé dan l apène, dann la tristèss.

Georges Gauvin