Hommage

LULU, mi souète aou in bon voiyaz pou alé dann l’androi wi doi alé !

In kozman pou mon kamarad i sorte désote la vi

Georges Gauvin / 24 novanm 2020


Mézami, kamarad Lulu, la fine alé l’ot koté la vi . Kan in moun wi koné lé malad i sava konmsa ou na bo dir wi atandé in nouvèl konm sète -la, mé kan èl i ariv, ou néna konm linprésyon li la parti tro vite. Lé vré k’la vi lé kourt , lé kourt pou toutdemoun, mé ankor pli kourt pou sak néna ankor in takon projé pou réalizé, in takon zafèr pou fèr avan d’alé. Moin lé sir konéssan ali par son travaye, par son bann lokipasyon li l’avé ankor in bonpé paj blan dann son l’agenda pèrsonèl pou li ranpli. Mé li la parti é sé la k’wi di, li noré pu..

Li noré pu konm jenn jan kranèr té i sort déor é té i ariv issi, profite lo tan, profite la vi, kontante sak pou sèrtin sé lo bon tan kolonyal... Li noré pu konm désèrtin majine nout péi lé né lo zour zot la poz lo pyé Gillot,lu noré pu majine sé sonprézans k’i rann lo péi zoli ;anfin li noré pu épouz par raport a nou toute bann préjujé lo moun déor k’i ariv issi dann in péi konki. Mé Lulu lété pa konmsa !

Nout kamarad lété pa konmsa lu é mi atann ankor sa voi kan li téi di :« Kissa i komand nout péi ?Kissa i komand nout pèp ? » ... Konbien foi moin la antann kozman-la, é zordi ké mi antand ar pi LULU di sa toudinkou mi réaliz la fors in kozman li téi di konmsa. Lulu, mi pans ziska dèrnyé dé dèrnyé zour, dann out tète, bann mo-la ou la répète sa par dizène é dizène de foi, konm ou téi vé amenn nout péi épi nout pèp dann shomin nout libérasyon. Plito konm in l’invitasyon adrèssé nout péi épi nout pèp ppu li angaj ali konm in gran, kon lo mètr sondéstin, dann la voi nout libérasyon.

Poitan moin la fine di Lulu lé pa né dsi la tèr rényonèz, mési ou lé pa né in l’androi, wi pé kant mèm ronète dsi in tèr ou lé pa éné é mi pans sé issi ké ou la ronète. Nout listoir té out listoir, nout révolt out révolt, nout fyèrté lété out fyèrté, é nout doulèr lété out doulèr kan ou téi suiv lo shomin l’amenn Elie lo shèf la révolt Sin-Lé dopi son l’anvi révolté ziska son l’égzékission kapital.

Kamarad, mi koné pa lo péi wi sava, mé mi éspèr laba ou sar bien é si ou i gingn lokazyon moin lé sir ou va kontinyé avèye anou, okip anou ziska k’in zour, ni éspèr é ni kroi,lo bann késtyon : kisa i komann nout péi, kissa i komand nout pèp nora pi konm répons sète ni pé aport zordi mé in répons mil foi pli méyèr pou nout péi, épi pou nout pèp.

Lulu, ni artrouv pli d’van é ni souète aou in bon voiyaz pou alé dann l’androi wi doi alé.