Oté Jean-Marcel, kosa sa ?
Out manièr dousman dousman, ou larg anou vitman kom sa, ou sar repoz Cimetière Paysager, in landroi té ral aou, biensir la komune la fé !!
Nou, n’i rèss là, kom ki diré, si not fin. Tout bann zafèr ou navé ankor pou aprann anou, koman nou sar débrouy nout kari astèr ?
Ou la toujour été nout modèl, dizon nout konsianss : « Toujours du côté du bon, toujours combattre la misère, contre l’injustice ».
Sa bann mèss bass filozofik avèk Manman, ou koné : lé pa grav, na trouv in solision, kisa i fé sa mintnan ?
Ni woi tout out bann kamarad lé là, sa kamarad là, kamarad e parti, sa in pasion la dévor aou sa !!!
Eskiz anou, sa in shoi la priv anou in ti pé d’ou. Mé ni plin pa nou, ou la done anou tèlman, é avèk kèl sianss !
La politik - laktialité - la press - la koz kréol biensir, mé osi le bann ti piédboi i fé pousé pou done demoun, épi n’i oubli pa le prinsipal : out koudmin pou fé kui manzé... out rougay margoz... out shopsui... Manman le soté-d-mine.
Oté Jean-Marcel, sa in mové farss ou fé anou ozordi là, mé kom nou la toujour di dan la fami : si Jean-Marcel la fé sé k’i doi avoir in bon rézon.
N’i di aou mèrsi, mèrsi pou tout.

Fonnkèr ékri par la fami de Jean-Marcel, é di si sa tonb par Nancy sa petite-nièss