Oté, nana in tralé zafèr po fé. Dakor, fé roul maloya. Soman, n’i dovré mazine fé in kabar, in vré, po tout sat la mazine révolté. Kansa nou va gingn roganiz in kabar po bann maron, sat nou koné, sat nou koné pa non-pli ? Mazine azot nana in trézor demoun la zété, la bordé, po pi konèt ousa i lé. Kosa i lé ?
Sé Sudel Fuma, in éspésialis nout listoir lesklavaz, téi rakont anou nana kèk moi-d sa, la disparision in éskélèt in noir maron, in moun Silaos la trouvé dann zané 1980. Mizé Léon Dierx la pèrd, la DRAC i koné pa ousa i lé, Konsèy zénéral ansanm. Ala in lègzanp in trass i fo niabou artrouvé. La pa dan in moi, va trouvé, alon di toudsuit. Soman i fo n’i okip, zot i di pa zot ?

É la révolt Elie

Kosa la fé zistoir la révolt Elie, laba Laleu, dann kartié troi lèt ? Sa osi i fo vienbou mèt an valèr. In zarlor nout listoir n’i bord. Mi pass pa par kat somin. Lé pli fasil sélèb bann zistoir péi déor, soman nout prop zistoir, n’i oubli. Mazine azot, kan lo kolèktif Elie la mèt ansanm po roganiz in fèt po zévènman-là, navé in ti porsion demoun la vni mèt la min, lo kèr ansanm. Rénioné la pèr son zistoir, son pasé ? Li yèm rienk yinkyink dési la mizèr son bann zansèt, soman i mazine pa mèt anlèr bann vanzèr la liberté, bann rézistan. Oté, nou nana in moi dovan nou po palank la done. Anon fé ...

Ed bann zasosiasion kiltirèl rénioné !

Là, an Franss, bann lantant kiltirèl rénioné la désid onor la Fèt kaf. Marsèy aou, Lyon aou, Pari aou. Lé doss. Koman èd bann group rénioné i vé export azot, zot mizik, zot fonnkèr ? Là, moin la rankont bann zèn zartis rénioné dann in stil nouvo. La domann amoin kosa i fo fé. A vré dir, mi koné pa moin. Bann kolèktivité, kisoi la Rézion, kisoi Départman, ousansa bann komine solidèr, nana sirman inn pist po diriz bann bone volonté. Sa in ansèrv po la promosion nout kiltir. N’i koné tout la mizèr nou vienn pasé èk Shikoungounya. Dawar sa va ankouraz ban touris arvnir dan nout péi, po dépanss zot larzan. Sirtou, banna va konèt nout listoir, débi ziska la fin. Sirman...

Bbj