Pouvwa se moun soud
Ki kwè nan goud
Grandèt chita nan Lafrans
Ape manje melonfrans

Pouvwa se moun soud
Ki kwè nan goud
Grandèt chita nan Toulouz
Ap manje diri mangougous

Pouvwa se moun soud
Ki kwè nan goud
Grandèt chita nan Nouyòk
Ape manje Manyòk

Pouvwa se moun soud
Ki kwè nan goud
Grandèt chita Etazini
Ape manje diri

Pouvwa se moun soud
Ki kwè nan goud
Grandèt chita nan Kanada
Ape manje kann anana

Pouvwa se moun soud
Ki kwè nan goud
Grandèt chita Kebèk
Ap manje kenèp

Sanchosèt
Grandèt renmen mepri
Soufrans se yon komedi
Sòyèt te mèt rele
Grandèt ap bonnaye

Paske li nan soufrans
Sòyèt wè byenfezans
Paske li nan pouvwa
Grandèt wè fannfwa

Pouvwa se fèmen je
Toupizi malere
Sòyèt te mèt rele
Grandèt ap bonnaye

Pouvwa se konprese
Pye lavi malere
Sòyèt te mèt rele
Grandèt ap Bonnaye

Lè wou pa gen mwayen
Yo pa pran w pou anyen
Grandèt renmen mepri
Soufrans se yon komedi

Lè wou pa gen lajan
Wou se yon kannannan
Grandèt renmen mepri
Soufrans se yon komedi

Lè w se pitit Sòyèt
Wou se moun san chosèt
Grandèt renmen mepri
Soufrans se yon komedi

Pa gen Zòrèy
Grandèt chita sou pouvwa
Se pou domine yo la
Lojik gwo ki vin pi gwo
Lojik wo ki vin pi wo

Plenyen plenyen sou plenyen
Pap janmen chanje anyen
Pouvwa pa genyen zòrèy
Pou tande kè ki nan dèy

Kriye kriye sou kriye
Anyen pap janmen chanje
Pouvwa pa gen zòrèy
Pou tande kè ki nan dèy

Rele rele sou rele
Anyen pap janmen chanje
Pouvwa pa genyen zòrèy
Pou tande kè ki nan dèy

Movesan mande pitye
Anyen pap janmen chanje
Pouvwa pa genyen zòrèy
Pou tande kè ki nan dèy

Anro anba
Bagay yo pat janm egal
Yo pa gen menm direksyon
Yo pa genyen menm desten
Se konsa sosyete ye

Grandèt pran avyon avyon
Li monte anlè anro
Wi anro anro anro
Wi anro anro anro

Sòyèt menm pran parachit
Li desann anba anba
Wi anba anba anba
Wi anba anba anba

Bagay yo pat janm egal
Se konsa sosyete ye
Wi anro anba anro
Wi anba anro anba

Yo pa gen menm direksyon
Se konsa sosyete ye
Wi anro anba anro
Wi anba anro anba

Yo pa genyen menm desten
Se konsa sosyete ye
Wi anro anba anro
Wi anba anro anba

Levebese
Bagay yo kòdjonm kòdjonm
Tout bagay yo tèt anba
Si yonn ape domine
Lòt la pa kapab monte

Grandèt kape domine
Sòyèt kape ankese
pwomosyon se pou Grandèt
opresyon se pou Sòyèt

Grandèt kape domine
Sòyèt kape ankese
Bon pozisyon se pou Grandèt
Represyon se pou Sòyèt

Grandèt kape domine
Sòyèt kape ankese
Grandèt leve tèt anro
Soyèt bese tèt anba
Nan limajinè
Grandèt yo di mizè
Se nan limajinè
Grandèt, moun ki byen, di
Se nan koko lespri

Mezanmi mezanmi
Mwen kwè se pa manti
Vant se zanmi lespri
Se leson lanati

Mezanmi mezanmi
Mwen kwè se pa manti
Bezwen lye avèk lespri
Se volonte lanati

Byenfè osinon mefè
Metabolis gen zefè
Andedan fon lespri
Se volonte lanati

Lè yon moun nan malpri
Lespri kapab pati
Pa gen rans ni radòt
Se yonn antre nan lòt

Edner saint Amour