Stéphane Kenklé, Christophe Dennemont èk Rio Palme I invit azot in lexpo konm nou la zamé vi, dési Art sénik, Ravine des Sables, Sin-Lè. Zot la mèt ansanm dann lo kolèktif Aléaa. Azot, trap sékanss par sékanss. Sékanss po dékoupé.

Par-là lo 7 oktob ziska lo 4 novanm 2006, banna i okip la galri Art Sénik. Parlfèt, sé in voyaz dan nout tournéviré toulézour, in voyaz osi dan laktialité nou artrouv dan lo Monn antié. Nora o moin 400 zèv po dékouvrir, épi troi tablo i di tout dési lo travay shak pint i fé. Parské i fo bien dir anou : Stéphane Kenklé, Christophe Dennemont èk Rio Palme sé-d pint. Alé pa étone azot zot lé sézi. Zot i rokonèt ar’pa nout galri préféré. Bann zèn-là la done ali in bon kou zènzan, èk tout bann kestionman. Parlfèt, sé in farfar bann kestion nou pé poz anou dési la gèr, la mor, travay akoz pa, lespor, lamour, la vi, é konsor. Tanto zot va kalbit dési in kont fagoté, tanto zot mazinasion va kalbit dann séri ladilafé. Sé in lamontraz po gramoun, po ti marmay, po sat i koné, po sat i koné pa. Oté, nora sirpriz po zot. I fo pa zot i mank sa. Vèrnisaz va espasé domin, si koté Art Sénik. Loup pa ali.

Bann zèn zartis-là, la fine tourné èk zot lespérians la pintir à vif. Zot la fine pasé dann la sal Charles de Beaumoulin si koté Tampon, an 2003. Zot tablo té akroshé dann salon bann zar kontanporin, sèt ané. An avril, zot la mèm fé zot posion d’avril, shé nout bann konfrèr lo JIR. Di 17 zisko 22 oktob, zot i pé artrouv lo kolèktif Aléaa à Cilaos po la kinzèn d’oktob. An zanvié 2007, sé la galri Kephren i ramass zot bann kréasion. Sa osi i fo zot i niabou voir. Sora mazik. Tienbo larg pa la pintir là. Nou nora lokazion artrouvé.

Babou B’Jalah