I di aou anlér dann milyé la mér
Twé navé groblan si bato lontan
I di aou dann fon sou bato lontan
Twé navé bann nwar té konm zanimo
Zot i vir par isi
Zot i biny dann san
Zot i vir par la
Nana loséan.
Banm kalou banm !
Banm kalou banm !

Vyé gramoun i di dann tan komandér
Twé navé boug nwar té i tyé zot frér
Aforstan soufér la pran la kolèr
Koulèr fanbwayan kan sa lé an flér
Lo san la kayé
Dési nout pasé
Boubou la pousé
La pokor pété
Banm kalou banm !
Banm kalou banm !

Zot i wa zordi ni désot la mér
Po nou rod travay wi nou lé somér
Zot i wa talér mi sa pran laviyon
Po kit mon péi i apèl la Rényon
Zémigré zordi
Lésklavaz lontan
Pari lé zoli
Nou na pi zinnzan.
Vronm kalou vronm !
Vronm kalou vronm !

Komandér zordi pi parèy lontan
Sabouk konméla zot i roul langaz
Zot i giny larzan po byin koz fransé
In morso kréol la pi kab tiré
Koté zot nŒin pèp
La po rod kriyé
I sa pa lékol
I sava maron.
Banm kalou banm !
Banm kalou banm !

“Banm kalou banm”, extrait du CD “Foutan Fonnkér” de Danyèl Waro