Commandeur oh ! té commandeur
Attend’ ein pé nous n’y attend
Va v’nir le temps va v’nir le temps
N’aura pi la race commandeurs...

Commandeur cass’ pas ton chabouc
Ti tap’ amoin ti fais ton blanc
Ton gueul’ l’est comme ein gros babouc
Poique à moin té lé ressemblant...

Commandeur oh ! té commandeur
Attend’ ein pé nous n’y attend
Va v’nir le temps va v’nir le temps
N’aura pi la race commandeurs...

Mon dos y brûle comm’ d’si piment
Avec de sel zot l’a frotté
Adié z’angoune ! eh ! mon z’enfants
D’sus l’échelle moin l’est garotté...

Commandeur oh ! té commandeur
Attend’ ein pé nous n’y attend
Va v’nir le temps va v’nir le temps
N’aura pi la race commandeurs...

Café l’est rouge d’sus l’argamasse
Mon femm’ l’a pi cab’ lève calou
Z’enfants zot y guett’ dand’ cal’basse
Si n’a d’manioc la viand pou’ nous...

Commandeur oh ! té commandeur
Attend’ ein pé nous n’y attend
Va v’nir le temps va v’nir le temps
N’aura pi la race commandeurs...

Mon zié l’est sec à force pleurer
Commandeur ral’ fort ton z’oreil
Marrons dand’ Cirque y veille soleil
Pou’ batt’ tambour la liberté...

Commandeur oh ! té commandeur
Attend’ ein pé nous n’y attend
Va v’nir le temps va v’nir le temps
N’aura pi la race commandeurs...

La poud’ fusils là va péter
Lé sûr qu’no va dans’ maloya
Dou lait dou miel pou’ nous ouaie ah !
Là dand’ nout rond no va chanter...

Albany J. : “Commandeur” in Bal Indigo, chez l’auteur, Paris, 1976