Mwa désanm, sa lé gadyanm ! mawa désanm, tout zafèr i pèt anflèr : flanboyan i mèt dofé dann kèr piédboi vèr, zakaranda, Tanpon, i déroul tapi blé-mov po kardinal rouz fé lamour anndan. A ! wi, Tikok i yinm mwa désanm, sa lé gadyanm ! Granmatin, zwazo bélyé, mwano, bèkroz, i di bonzour solèy i prézant. Solèy lé fyèr dann mwa désanm, lo rwa lé pa son kouzin ! li fé kour la fré dan léo, li fé kour marmay dann basin dolo. Bann sarèt, sad granmoun Biganbé ansanm, la pa atann lo zour kléré po fé zot priyèr : zot i kri, zot i grins dann somin makadanm. Bèf o pa kadansé ! sé la koup dan mwa désanm ! la koup zot doulèr ! La kann ! Kann po sisé, bann marmay i kalkil, Tikok an promié ;

Christian Fontaine, extrait de "Zistoir Tikok, Listoir Tikok"

Fonnkèr po kozé

Minis la débarké, bann gran gozié dann gro soulié
Minis i sar kozé. La di, la fé...

La di moustik anarsik va sort dann sité
La pro-mès anou in batay larmé
La di, la fé...

La di moustik nostalzik sif pa dann kartié
Banna lès po nou in volaz lestré
La di, la fé...

"moustik pik pa moin"
Moringèr sikoungounyé, maloyèr dingé,
La mèt ansanm po ...
Folklor nout valèr, po Minis san lonèr.
Afèr kri ali Papa ?

Roul pa ton rin si out kor mavouzé
Zèt pa nout kiltir dovan Minis-là

Toyo Limon
Yèr mwin la ékri, zordi zot po li