Kosa i lé in kini ? Sé in mo indien la rant dan nout vokabilèr. Sé in zasièt an kuiv é an bronz.
E kine, zot i koné ? In zour, banna la kine amoin. Nou té po zwé kine. Parlfèt, kine sé in zé loto, i fo done lo bon niméro po gingné. Soman, kine sé osi lo vèrb mourir ou détruire.
Palikoun, kosa i lé ? "Fé roul roulé palikoun, lès ali mèt son moulir", la ékri Patrice Treuthard. Parlfèt, palkoun sé lo dérièr. "Fais rouler encore et encore ton derrière, laisse-le faire des façons".
An-tou-ka, vèy out palikoun, lèrk in sipay i vien kalbit èk ou. Kosa in sipay ? in moun frèl ? non, li tonm plito konm in gro boug kosto, gran, for. Odrémié, lèss ali trankil. Zot i kroi pa ?

Farfarliv

Si zot la poin bann liv-là dann zot bibliotèk, alé rodé, prété (vol pa soman). Nana détroi liv, i shap pa, i fo lir. "Vendredi matins", Francky Lauret la ékri shé Azalées Editions. Son troizièm roman i ral anou dann in zistoir sou l’kap litoral. Apré léboulman la tié dé moun débi lané 2006, lékrivin i pouss anou gard pli loin, trap lespoir la vi sou lo poi listoir. In liv à lir, à rolir.
In ot liv zot i doi pa nioré. Si zot i trouv "Les origines du patois de l’île bourbon" d’Auguste Vinson, sa osi lé oblizé lir. Sé lasosiasion Tangol la fé sort sa, parlfèt nana in gro travay Monique Payet. Zot va voir. I rakont lo trasé la vi Auguste Vinson, in zoréol parlfèt, la énèt an 1819, épisa nana in rol konsirab po la sians, po la kiltir, po listoir, po la natir, po la litératir, nout péi. In zarboutan la lang kréol i mérit èt koni ; ala inn. Liv-là osi alé trap vitman, avan na pi. Ousansa, alé rod sa, kisoi dann médiatèk kisoi dann bibliotèk, po prété.
Po tout sat i èm la natir nout péi, épisa nout limazinèr, Dominique Dambreville i invit azot voyaz sou lo voil la marié è vèrs inn rinslèt nout zié dési in lilèt pandiyé. In gayar lézann rénioné, fagoté dan nout tournéviré toulézour, astiké par limazinasion lékrivin. "Le voile de la mariée - ou les larmes de l’îlet bananier" lé préfasé par Paul Vergès, prézidan lo konsèy Rézional, dépité Lérop. Stéphane Fouassin, lo mèr Salazie, i sine lo katrièm kouvèrtir. In mazinasion lantant ?
Volkan i vienn pété. Zistérézon prézant azot lo liv Ernest Gannaz, "Coulées de lave, couleurs de vie". Bann fonnkèr an fotografi. Bann foto-poèm po rakont la vi La-Rénion. Koman nout péi la énèt. Koman lo vèr la natir i done la koulèr tout nout vi.

Bbj

"Vendredi matins", Francky Lauret, Azalées Editions, 2006, 10 euros
"Les origines du patois de l’île bourbon" Auguste Vinson, Association Tangol, 2006
"Le voile de la mariée - ou les larmes de l’îlet bananier" Dominique Dambreville, Azalées Editions, 2O euros
"Coulées de lave, couleurs de vie" Ernest Gannaz, Azalées Editions, décembre 2005, 25 euros

Fonnkèr po in zarlor nout kiltir

Oté Marco !

Aswar lo ron lé apropté
Boulouz fonnkèr maloya
" Koman i lé lao ? " " Oté Marco ! "

Kabar doukèr
Tout la bann fonnkézèr

Hin ! La di " Rouv lo ron " " Marco mon dalon "
Konm la fé Trëtar, laménèr kabar
" Oté Marco ! "

Maronn aou lot rebor
Fé l’kivi, kinm la fèl sak i vi
Fanantenana tout nout lanbéli

Oté Marco, Kabar doukèr sanm nou
Lao ? Lé pli kann roul maloya ?
" Oté Marco ! "
Batt pa tsiny si nou
Roul maloya sanm nou odrémié
Si nou kabar doukèr po ou

" Oté Marco ! "

Pli tann, pli kann
Sa doumièl dann sièl

Pli tann, pli kann,
Sa doumièl dann fièl

Babou B’Jalah, 26 out 2006, o Kabardock Lo Por