- Monmon ! Not dé Tikarl i dsann la kaz Timari, in ?

- Alé azot. Amiz pa soman. Sirtou, Tikok mi prévyin aou, artourn pa isi èk linz an morso, sinon mi koup out déyér.
Ariv la kaz Babé tout la bann lé apo zwé loukasyèt. Tikok ék Tikarl i rant dann ta. Soman, pou komansé i fo rod kisa lo mér. Sé Zorzyane i rouv lo zé :

- Plouf ! Inetikét, Mari-Bonbét, Kani-kanèt, trik !
Promyé trik i tonm si Zanpyér.

- Plouf ! Inetikèt, Mari-Bonbét, kani-kanèt, trik !
Dozyinm trik : Tikok.

- Plouf ! Inetikèt, Mari-Bonbét, kani-kanèt, trik !
Lo tour Maryanne po sorti.
I rèt Zorzyane ék Tikarl, astèr !... Sé Tikarl va tonm lo mer.
Tout i fé kondisyon : « In bigobé, ali minm lo mér ! » Zot i di Tikarl bous son zyé, kont ziska vin. Aprésa, tout la bann i kour kasyèt, Zorzyane i kour dann karo zerb roz, sou pyé kinkina. Zanpyèr li, li mèt zis son tét déyér in féy sonz, la li krwa personn i wa pa li. Tikarl i kont, i kont minm. Soman, li fé sanblan bous son zyé, aléwar, li ogard rant son dé min. Li koné Zorzyane i sa rod bigobé. Li bouz pa son plas, li kont minm. Kan i ariv vin, li kri : « Paré, pa paré, mi débous ! »

- Zanpyér vyin aou ! Mwin la vi aou !
Apréla, li véy dék Zorzyane i lév son ti tét dann zerb, li kri :

- Zorzyane, pa bézwin débouz plis mwin la vi aou !
Astér i rét riyink Maryane ek Tikok. Tikok la pa lwin : i dbout koté in zénis dann park. Béf i kour pa li, li lé abityé. Son pyé lé dann ros tann, mous karapat i pik ali, li bouz pa in grin pangar va war ali. Férkwé, Tikarl i vir son tét lot koté !
Op ! Tikok i sot, i kri : « Bigobé ! aou minm lo mér, Tikarl ! A ! a ! la giny aou la ! »
La zwé, la zwé... Aprésa, tout la bann lavé fin, la parti manzé.

Fontaine C. : "In parti loukasyèt" in Zistwar Tikok, CDPS, 1988, p.24.