In marmay lavé vréman mové karaktèr : lï té i mèt alï an kolèr fasilman. Lï té ézit pa répond dëmoun an bob, donn azot in boush-ta-guèl.
Son papa la donn alï in boit klou avèk in marto épï la di alï :
"Si ou lé ankolèr avek in moun, si ou dispït avèk in moun, si ou donn dëmoun in boush-ta-guèl, plante in klou dann baro."
Prëmié jour lë marmay la mèt 37 klou dann baro.
Fir-a-mëzir, lë nomb klou la diminïé ziska lë jour, li la pa fish in sèl klou dann baro.
Alor, lï la parti oir son gramoun épï lï la di : « papa, moin la pa dispït avèk pèrsone, moin la pa kritik pèrsone, moin la pa fé mal pèrsone ; moin la pa mèt in sël klou dann baro jordï. »
Son gramoun la amen alï devan baro épï la di alï : « Ou la bien konport aou, mi fé bien konplimant aou. Astèr, si ou dispït pa apré pèrsone, si ou mèt pa ou an kolèr, si ou fé pa mal pèrsone, ou rash in klou par jour. »
L’ariv in jour, navé pï klou dann baro. Lï la parti di sa son papa. Sèt-la la amen alï dëvan baro épï la di alï : « Ou la bien konport aou, solman agard toussa trou nana dann baro ? Baro-la sar pï jamé konm lï lété avan ! Ou oi, kan ou mèt aou an kolèr apré in moun, kan ou mèt bann rèss trankil, la mark i rèss dann kèr dmoun, i éfas pa. »
Si ou pik in kouto dann bra in moun, si ou artir kouto-la, épï ou éskïz, eskïz aou in bon pë foi, lë bra i rèss blessé mem.
In doulèr dann moral i fé mal konm in doulèr dann kor.
Alor, fé tansion sak ou di. Démyé ou tourn sèt foi out lang dann out boush avan dï in n’afèr lé riskab fé soufrir dmoun.

G.Gauvin la mèt an kréol in n’afèr l’ariv par internet an fransé.