"Sé in laboutisman pou nou" i esplik Arno Bazin, aménèr lo group. "I fé 6 z’an nou fé la mizik. O débi, nou la fé sa dan in lespri kamarad ; zordi, sé in louvèrtir dann in péi déor" li kontini. A partir lo 18 avril ziska lo 2 mé, bann tapokèr i sava an Franss po, daborinn in léstaz dann Studio des variétés à Paris, épisa in konsèr lo 26 avril o Printemps de Bourges. Bourges ! lo group i rèss modèss parlfèt. "Sé inn dékouvèrt. Alorss, nou espèr demoun va romark nout travay. Si nou pé avoir lé mèm oportinité ke lé zot group la parti. Sré doss" Arno i di.
Mé sé san dir ke lo group i profit firamézir inn rékonésanss. Déza à La Rényon : dépi lontan, lo group i tourn for dési lil. Son derniè CD "Tapokopat" i vann konm ti pin. Zafèr i tourn for. Nana 6 z’an d-sa, persone noré zamé pansé ke lo group noré tourné komsala. Zordi lé fé. Tapok i viv in gayar zistoir.

Inn port ouvèrt si Lérop

Biensir, lo group va kontinié zoué La-Rényon. Somansa, Tapok i pé pa nioré louvèrtir dési Lérop. Dépi-k li la été sélèksioné pou Bourges, Tapok lé dan lo label “5 planètes”, ké va fabrik d’ot CD pou La Franss é bann péi Lérop. Label-là i sort dann la min Philippe Krümm, i diriz lo rovi “Accordéon Magazine”. La dédan ou ar’trouv Aldo Ledoux, i zwé lakordéon po Tapok, in potomitan mi di. In ot zafèr ankor : inn sosiété “Believe” i okip vann bann morso tapok dési Internèt.
Zordi, Tapok lé anlèr. Lé doss po zot, po nou osi. A pèn arivé an Franss, zot i komanss par in lestaz pèrfèksionnman “scène, voix et coatching” pou-k lo group i antann ankor plis ansanm, dékouv bann nouvèl tèknik, mié bouzé dési la sèn, brèf ! fèr évolié zot travay, pou èt pli gabié ankor, pou èt plis an faz èk bann zakoutèr, bann rénioné. An-tou-ka, zot i pé ar’trouv lo group vitman. So samdi, zot i zwé Sint-André, po “Quel Train, chemin la gare”. Alé di partou, banna i zwé à 21h 30.

Bbj

Tapokalandrié 2006

25 février - Salle Guy Alphonsine (Saint-André) à 21 h 30, dans le cadre de Quel Train, Chemin la Gare !
25 mars - Salle Guy Agénor (Plaine des palmistes)
Du 19 au 22 avril - 18 heures de stage au Studio des variétés à Paris
26 avril - Printemps de Bourges
Mai : dans le cadre de la nuit des musées au Stella Matutina
2 juin : Bato Fou
3 Juin : Kabardock
25 août : scène des badamiers à TPA de Saint-Gilles
23 décembre : Africolor (Paris)
date à définir : Théâtre sous les arbres