Komandër oté komandër
Atann in pë nou n’i atann
Va v’nir le tan va v’nir le tan
Nora pli la rass komandër

Komandër kass pa ton shabouk
Ti tap amoin ti fé ton blan
Ton gël lé konm in gro babouk
Poik amoin té lé rësanblan

Komandër oté komandër
Atann in pë nou n’i atann
Va v’nir le tan va v’nir le tan
Nora pli la rass komandër

Mon do i brül kom d’si piman
Avèk desèl zot la froté
Adié zangoun hé ! mon zanfan
Si léshèl moin lé garoté

Komandër oté komandër
Atann in pë nou n’i atann
Va v’nir le tan va v’nir le tan
Nora pli la rass komandër

Kafé lé rouz d’si largamass
Mon fanm la pü kab lèv kalou
Zanfan zot i gèt dann kalbass
Si na d’maniok la viann pou nou

Komandër oté komandër
Atann in pë nou n’i atann
Va v’nir le tan va v’nir le tan
Nora pli la rass komandër

Mon zié lé sèk aforss plëré
Komandër ral for ton zorèy
Maron dann Sirk i vèy solèy
Pou batt tanbour la liberté

Komandër oté komandër
Atann in pë nou n’i atann
Va v’nir le tan va v’nir le tan
Nora pli la rass komandër

La poud füzi là va pété
Lé sür k’no va danss maloya
Dou lé dou mièl pou nou way ha !
Là dann nout ron no va shanté

Retranscription du texte “Commandeur”, in "Bal Indigo", Poèmes et chansons créoles de l’Île de La Réunion de Jean Albany, 1976, publié chez l’auteur 7, rue du Dragon Paris.