Renésens i vienn fé sort son dernié CD "Intercultural". Kisa la pa parti ashté ? Lé bien domaj. Alala bann nouvo morso Renésens. Kisa i koné pa group-là, i sort Sint-Sïzane, épi la Bretagne an Frans ? Oté banna ! Nana in mésaj dérièr tout shanson, in mésaj i prèsh po lantant rant bann pëp, in mésaj po partaj nout bann kiltir. Renésens, sé lamour dë péi. La Rénion èk sat bann breton. Dominique Aupiais, sé in fonnkézèr, in poèt, in romansié, in lartiss in koné le tiktak po fé avans anou si térin lïmanité. "Intercultural" sé sa mèm, sé in CD i koz lantant. tansion ou koné pa bann gran militan, tansion ou oubli sat la fine désot la vi, tansion ou majine la joliès out péi, ala le group Renésens i vé amont anou par ékèl koté nout vi lé gayar. Soman, azot i koné group-là, lété forsé navé in joli romans po Damien, nout dalon, sat la parti rod zèrb bann zanj si la tèr Nosy Be. "Hymne à Damien" i trap dann kèr, i sézi landan, i glass la shèr dann souvnans in zistoir. Oté, Renésens, done kalou, amont anou ankor zot zarlor. Mèrsi po se gayar fason amont nout lorijinalité kréoloceltik.

 Bbj